VV i reagon Abrashit: Deklaratat e tij janë idiote, Isa e ka model Putinin!

Zëdhënsi i Lëvijes Vetëvendosje, Shkodran Hoti në një prononcim për GazetaBlic ka thënë se deklaratat e Abrashit nuk janë të habitshme, janë idiote, pasi që sipas Hotit, vetë shefi i Abrashit ka për model qeverisjen e Putinin.

“Deklaratat e Arban Abrashit nuk janë të habitshme, madje janë linjë e njëjtë me deklaratat e shefit të tij, Isa Mustafa, linjë kjo që më së miri përfaqësohet nga kasneci i kësaj qeverie, Bajram Gecaj. Ashtu sikurse nuk janë të habitshme, janë deklarime idiote, ngase vetë shefi i Abrashit ka për model qeverisjen e Putinit dhe një të tillë mundohet ta instalojë në vendin tonë, i cili tashmë për fat të keq, në raportet e ndryshme ndërkombëtare konsiderohet vend gjysmë-autoritar. Pra, këta udhëheqës që akuzojnë të tjerët për përfshirje në skenare të Rusisë, ndërsa e shohin Kosovën si një Rusi të vogël” tha Hoti.

Tutje Hoti ka thënë se Abrashi më së miri e manifeston dështimin e kësaj Qeverie, pasi që ka premtuar një numër të madh të vendeve të punës, por papunësia është rritur.

“Fillimisht, duhet sjellë në vemendje se Arban Abrashi është ministër i cili më së miri e manifeston dështimin e kësaj qeverie, ngase vjen nga LDK, e cila në zgjedhjet e fundit ka premtuar 120 mijë vende të reja të punës. Kurse Abrashi duke qenë në krye të Ministrisë së Punës e Mirëqenies Soicale, jo që nuk bëri hapa për hapjen e këtyre vendeve të punës, por papunësia veç sa është rritur dhe gjendja sociale e qytetarëve të Kosovës sa ëshë vështirësuar, për çfarë më shumë se 100 mijë qytetarë brenda një kohe të shkurtër e kanë lënë Kosovën. E në gjithë këtë katrahurë sociale, Abrashi dhe gjithë kolegët e tij nga ekzekutivi kanë dashur që me çdo kusht ta imponojnë “Zajednicën” e demarkacionin me Malin e Zi, për çfarë populli i varfër është shtypur dhunshëm vetëm pse ka dalë kundër këtyre koncesioneve” tha Hoti.
Hoti deklaratën e tij e ka vazhduar duke i kujtuar Abrashit rezistencat e opozitës në përgjithësi, por edhe të Vetvendosjes.

“Më pas, i kujtojmë këtij ministri të dështuar se rezistenca e opozitës në përgjithësi, por edhe e VETËVENDOSJE!-s në veçanti, ka qenë publike dhe pa asnjë skenar që nuk është ditur. Peticioni, sikurse edhe protestat qytetare në rrugë, janë mjetet me demokratike, të cilat e kanë shprehur më së miri vullnetin e qytetarëve të Republikës së Kosovës kundër këtyre dy marrëveshjeve shtetrrënuese. Në anën tjetër, edhe përdorimi i gazit lotsjellës është veprim që është ndërmarrë në mënyrë që të pamundësohet ratifikimi i këtyre marrëveshjeve, dhe me t’u hequr dorë nga to, është hequr dorë nga gazi dhe Kuvendi ëshë normalizuar” tha Hoti.

E krejt në fund ai ka bërë thirrje tek secili zyrtar qeveritar që t`i lënë broçkullat, përcjellë GazetaBlic.

Ne i bëjmë thirrje qeverisë fillimisht, që të mos provojë të imponojë më këto dy marrëveshje, sikurse kërkojë nga secili zyrtar qeveritar që t’i lënë broçkullat sepse secili e ka kuptuar të vërtetën e këtyre marrëveshjeve, dhe kushdo që e do Republikën e Kosovës sovrane e të pavarur, është kundër tyre. E njëkohësisht, paralajmërojmë ekzekutivin, që kundërshtia jonë ndaj tyre në rast se përpiqen të sillen në Kuvend do të vazhdojë. Rezistenca jonë do të jetë edhe më e fuqishme.