VV fiton zgjedhjet parlamentare, prin bindshëm me mbi 49 për qind të votave

Kosova ka mbajtur sot zgjedhjet e parakohshme parlamentare, ndërsa rezultatet e para preliminare tregojnë fitore të qartë të Lëvizjes Vetëvendosje.

Sipas të dhënave të publikuara nga Komisioni Qendror i Zgjedhjeve, me mbi 95 për qind të vendvotimeve të numëruara, Lëvizja Vetëvendosje ka dalë forcë e parë me 49,79 për qind të votave, apo mbi 421 mijë vota të fituara në nivel vendi.

Në vendin e dytë renditet Partia Demokratike e Kosovës me 21,18 për qind, ndërsa Lidhja Demokratike e Kosovës ka marrë 13,77 për qind të votave. Aleanca për Ardhmërinë e Kosovës ka siguruar 5,74 për qind, ndërsa Lista Serbe 3,87 për qind.

Sipas KQZ-së, pjesëmarrja në votime ka qenë rreth 43,66 për qind. Deri më tani nuk janë raportuar incidente serioze që do ta cenonin procesin zgjedhor.

Rezultatet e publikuara janë preliminare dhe pritet të finalizohen pas përfundimit të numërimit të plotë, përfshirë votat me kusht, votat e diasporës dhe ankesat eventuale.

PodujevaPRESS do të vazhdojë të raportojë për zhvillimet e mëtejme dhe rezultatet përfundimtare të zgjedhjeve parlamentare.