Vulaj kritikon Evropën: Zhvillimet e fundit tregojnë se s’kemi mik tjetër përveç Amerikës

Ish-drejtuesi i Këshillit Kombëtar të Shqiptarëve në Shtetet e Bashkuara të Amerikës, Martin Vulaj, ka thënë zhvillimet e fundit kanë treguar se Kosova nuk ka mik tjetër përveç Shteteve të Bashkuara të Amerikës.

Në një lidhje direkte nga SHBA në emisionin Info Magazine në Klan Kosova, ai ka thënë se nëse Kosova mbetet në duart e evropianëve, ka shumë frikë në të ardhmen e saj.

“Është shumë e rëndësishme që pala kosovare të bashkohet me një konsensus dhe me një kërkese për vazhdimin e dialogut Kosovë-Serbi”.

“Përndryshe, e vetmja rrugë që kemi si komb dhe shtet është në të vetmit aleatë që kemi. Zhvillimet e fundit kanë treguar se nuk kemi mik tjetër përveç Amerikës. Ne duhet të angazhohemi dhe të punojmë në këtë drejtim”.

“Nuk kam asnjë fakt ta akuzoj askënd, por është shumë e qartë beteja që po bëhet ndërmjet Shteteve të Bashkuara dhe Bashkimit Evropian”.

“Çka më shqetëson është qasja e Evropës ndaj shqiptarëve për një kohë shumë të gjatë. Alarmuese është ajo çfarë kanë bërë me Turqinë, Europa nuk na sheh shumë ndryshe nga turqit sepse edhe Serbia ka punuar shumë për ta pasur ata këtë pikëpamje ndaj nesh”.

“Edhe pasi kemi përmbushur të gjitha kushtet për vizat, pasi i kemi dhënë tokë Malit të Zi, prapë e kanë thyer atë marrëveshje”.

“Ne nuk kemi mundësi që të kemi besim në aleatë tjetër. Nëse mbetemi në duart e evropianëve, unë kam shumë frikë për të ardhmen e Kosovës”.