“Vrasje e rëndë”- Policia jep detaje të reja për vrasjen e 18 vjeçarit nga Podujeva

Policia e Kosovës i ka dhënë informacione plotësuese Gazetës Insajderi për vrasjen e 18 vjeçarit në Podujevë. Pas raportimit fillestar të policisë ku rastin e cilësuan si “Therje me thikë”, pastaj “Vrasje në tentativë”, tani policia ka orientuar hetimet në drejtim të veprës penale “Vrasje e rëndë”, shkruan Gazeta Insajderi.

Policia ka dhënë shpjegim se arsyeja e sulmit ndaj 18 vjeçarit ka qenë pas një zënke që të miturit kanë pasur mes vete, ditën kritike.

Sipas policisë, ngjarja ka ndodhur më 14.01.2024, rreth orës 13:00, në rrugën “Drenica”, në Podujevë, ku dyshohet se rrahja ka qenë vazhdimësi e një konflikti mes tyre që kishte ndodhur disa minuta më herët në rrugën “Jusuf Gërvalla” në Podujevë.

“Ngjarja që i referoheni ka ndodhur më, 14.01.2024, rreth orës 13:00, në rrugën “Drenica” në Podujevë.  E njëjta dyshohet të jetë vazhdimësi e një zënke (mosmarrëveshje apo konflikti) të ndodhur po të njëjtën ditë, disa minuta përpara, në rrugën “Jusuf Gërvalla” në Podujevë“, thuhet në përgjigje, përcjell Insajderi.

Policia ka treguar se fillimisht rastin e ka trajtuar si “Vrasje në tentativë” e më pas “Vrasja e rëndë”.

“Që nga momenti i parë rasti është trajtuar si “Vrasje në tentativë” dhe në vazhdimësi është punuar në mbledhjen e provave, fakteve e dëshmive, përfshirë këtu edhe marrjen e video pamjeve nga kamera të ndryshme, e që do ti kontribuonin zbardhjes së rastit.​ Përfundimisht pas marrjes së konfirmimit nga ana e klinikës ku po trajtohej viktima se i njëjti ka ndërruar jetë, atëherë me autorizimin e prokurorit të shtetit policia ka ri cilësuar veprën dhe ka orientuar hetimin në drejtim të veprës penale “Vrasja e rëndë””, thuhet në njoftim./Insajderi.org/