Vrasja në Pakashticë dyshohet se ndodhi nga pakujdesia

Prokuroria Themelore në Prishtinë ka njoftuar se vrasja e djeshme në Pakashticë të Podujevës, ku mbeti i vdekur një 30-vjeçar, po hetohet si vrasje nga pakujdesia.

Zëdhënësja e kësaj prokurorie, Laureta Ulaj, ka thënë për Kohën se i dyshuari është ndaluar për veprat penale “Vrasje nga pakujdesia” dhe “Mbajtja në pronësi, kontroll ose posedim të paautorizuar të armëve”.

Ulaj më tej njoftoi se me urdhër të prokurores, viktima është dërguar për obduksion, teksa janë duke u ndërmarrë edhe veprime të tjera hetimore në lidhje me këtë rast.

“Lidhur me këtë rast ju njoftojmë se me urdhër të prokurores nga Departamenti i Krimeve të Rënda, është ndaluar një person i dyshuar për veprat penale ‘Vrasja nga pakujdesia’ dhe ‘Mbajtja në pronësi, kontroll ose posedim të paautorizuar të armëve’. Me urdhër të prokurores viktima është dërguar për obduksion, derisa janë duke u ndërmarrë edhe veprime të tjera hetimore me qëllim të sqarimit të plotë të rrethanave të rastit në fjalë”, ka thënë Ulaj.

Ndryshe, nga kjo e shtënë me pushkë të gjuetisë ka mbetur i vdekur 30-vjeçari me inicialet M.K., trupi i të cilit është tërhequr nga Forcat e Sigurisë së Kosovës për shkak të terrenit të papërshtatëshëm.

Lajmin për Kohën e ka konfirmuar gjatë mbrëmjes së djeshme, zëdhënësja e Policisë së Kosovës për rajonin e Prishtinës, Flora Ahmeti.

“Sot rreth orës 16:00, kemi pranuar informatën për një rast të vrasjes që ka ndodhur në fshatin Pakashticë të Podujevës. Lidhur me këtë rast në vendngjarje, policia ka arrestuar një person të dyshuar, F.B mashkull 34 vjeç. Në vendngjarje janë sekuestruar dy armë të gjuetisë. Viktimë në këtë rast është M.K (mashkull), 30 vjeç, vdekjen e të cilit e ka konstatuar ekipi mjekësor në vendin e ngjarjes”, ka thënë Ahmeti.