Vetëvendosje kërkon ndihmën e PDK’së për rrëzimin e Qeverisë Hoti

Diçka e rrallë në skenën politike kosovar po ndodh, Lëvizja Vetëvendosje po kërkon bashkëpunim dhe ndihmë nga Partia Demokratike e Kosovës për rrëzimin e Qeverisë Hoti, shkruan Gazeta Metro.

Lëvizja Vetëvendosje e ka kuptuar se pa bashkëpunimin dhe ndihmën e PDK’së vështirë se do ta kenë të mundur rrëzimin e Qeverisë Hoti, duke parë se AAK dhe Nisma janë në Qeveri dhe nuk e përkrahin një mocion të tillë.

Lëvizja Vetëvendosje po synon rrëzimin e Qeverisë Hoti nëpërmjet ngritjes së mocionit të mosbesimit.

Aktualisht Vetëvendosje i kanë 31 nënshkrime dhe janë në përpunim e sipër të tekstit të mocionit, ata janë në pritje të shtesave në tekstin e mocionit që do t’i bëjë GP i PDK’së, grup ky që ka 24 deputetë.

Shefi i GP të VV’së, Rexhep Selimi tha dje se pre reflektimin e PDK’së për rrëzimin e qeverisë Hoti.

“Partia Demokratike e Kosovës është subjekt opozitar në Parlamentin e Kosovës, në retorikën e tyre kemi parë që ata kanë qasje kundrejt qeverisë aktuale. Ne presim që ata t’i mbajnë fjalët e tyre dhe t’i realizojnë me veprime konkrete”, tha Selimi dje.

Kujtojmë se më 25 mars të këtij viti ish- Qeveria Kurti ishte rrëzuar me ngritjen e mocionit të mosbesimit pikërisht nga LDK-ja, partneri i atëhershëm i saj./gazetametro.net