Vetëvendosje homazhe për Balajn e Xheladinin, mungon grupi i Molliqajt

11 vjetori i vdekjes së Mon Balajt dhe Arben Xheladinit e gjeti Lëvizjen Vetëvendosje të ndarë e me plot mospajtime.

Edhe në homazhet që u bënë për dy aktivistët e ndjerë u vërejt ndarja e kësaj partie në dy blloqe.

Për t’u dërguar lule Balajt e Xheladinit në sheshin ‘Nëna Terezë’ kishin shkuar kryetari i partisë Albin Kurti, dhe disa nga figurat që janë në mbështetje të tij, siç janë; Glauk Konjufca, Albulena Haxhiu, Mytaher Haskuka, Ismajl Kurteshi, shkruan Gazeta Metro.

Mirëpo, aty nuk u pa askush nga i ashtuquajturi grup i ish-sekretarit organizativ, Dardan Molliqaj.

I vetmi që mori pjesë në këtë organizim ka qenë Visar Ymeri, por i cili nuk ka vendosur kurora lulesh pranë pllakës përkujtimore.

Kujtojmë që më 10 shkurt 2007 u vranë nga Policia rumune e UNMIK-ut dy aktivistët e Lëvizjes Vetëvendosje, Arben Xheladini dhe Mon Balaj, derisa protestonin kundër negociatave të Kosovës me Serbinë dhe Pakos së Ahtisaarit, shkruan tutje Gazeta Metro.