Veseli i përgjigjet LDK-së: S’jemi koalicion i luftës, as i paraluftës por i së ardhmes

Kryetari i Partisë Demokratike të Kosovës, Kadri Veseli së bashku më kryetarin e Aleancës për Ardhmerinë e Kosovës njëherit edhe kandidatin për kryeministër, Ramush Haradinaj ishin sot në Rahovec.

Ata gjatë turit të dëgjimit kanë dëgjuar hallet e qytetarëve të Rahovecit, shkruan lajmi.net.

Më tutje, Veseli i është përgjigjur udhëheqësve të LDK-së se koalicioni PDK-AAK-NISMA është koalicion i luftës dhe i natës.

Ai ka thënë se koalicioni me Ramush Haradinaj është i së ardhmes perëndimore të Kosovës.

“Ne jemi koalicion i lirisë dhe sovranitetit, nuk jemi as i luftës as i paraluftës. Lufta ka qenë sakrificë e secilit qytetarë dhe jemi të vendosur që bashkërisht t’i bashkojmë edhe qytetarët tanë drejt Fillimit të Ri për Kosovën”, ka thënë Veseli, në Rahovec, ku ka folur bashkë me Ramush Haradinajn para disa biznesmenëve.

“Janë dy alternativa që janë konkurente me mua dhe Ramushin. Është opsioni, i cili është i dëshmuar se nuk merr kurrë vendime. Nuk ka vizion dhe nuk guxon të marrë përgjegjësi”, ka shtuar ai.

“E kemi alternativën tjetër që nuk e njeh Kosovën. Që dëshiron ta rrënojë Kosovën. Që dëshiron të thotë se jemi shqiptar nga sot. Të fillojmë nga sot të ndërtojmë një komb të ri”, ka thënë Veseli. /Lajmi.net/