Veseli: Dekada e dytë e shtetit, dekadë e një transformimi ekonomik

Kryetari i Kuvendit, Kadri Veseli ka vizituar të rinjtë në Innovation Centre Kosovo. Ai ka parë nga afër projektet e tyre të teknologjisë, shumë prej të cilëve kanë depërtuar edhe në tregun global, duke bërë kështu që të hapen mijëra vende pune në Kosovë, shkruan Gazeta Metro.

Në një postim në Facebook, Veseli thotë se dekada e dytë e shtetit të Kosovës, duhet të jetë dekadë e një transformimi ekonomik.

“Ekonomia e dijes dhe ajo digjitale janë çelësi i zhvillimit. Dekada e dytë e shtetit të Kosovës do të jetë dekada e një transformimi ekonomik. Dhe këtë mund ta bëjmë më se miri me rininë tona inovative dhe kreative. Sot, edhe një herë, takova të rinj në kuadër të Innovation Centre Kosovo, idetë dhe projektet unike te të cilëve kanë hapur qindra vende pune në Kosovë, si dhe kanë depërtuar edhe në tregun global”, ka shkruar ai.