Vendi ku u rrahë në mënyrë brutale drejtori Sokol Zogaj (FOTO)

Njolla gjaku dhe pjesëtarë të policisë janë parë të qëndrojnë në vendin ku para disa orësh është sulmuar drejtori i Shërbimit Korrektues të Kosovës Sokol Zogaj.

Hyrja e tij në lagjen Ulpiana ka qenë e përgjakur ndërsa policia ka analizuar  provat në vendin e ngjarjes.

Dy sulmuesit sipas të dhënave të deritanishme të maskuar me maska e dorëza kanë sulmuar me shufra hekuri Zogajn në hyrjen e ndërtesës së tij. Të njëjtit kanë ikur në drejtim të panjohur duke e lënë eprorin e burgjeve të shtrirë përtokë. Zogaj për momentin është duke marrë tretman në QKUK ndërsa KALLXO.com mëson se plagët e tij në kokë nuk përbëjnë rrezik për jetë.

Sokol Zogaj është ushtrues detyre i drejtorit të burgjeve për rreth një vit. Në mandatin e tij kanë ndodhur ndryshime përfshirë suspendimin e një varg drejtorësh të burgjeve dhe drejtorëve në drejtorinë e burgjeve.