Vëllai i Fitore Pacollit bën thirrje për linçim të Isa Mustafës

Fitim Pacolli, vëllai i deputetes së Lëvizjes Vetëvendosje, Fitore Pacolli, siç duket po bën thirrje e organizime për të linçuar kundërshtarët politikë, si kryetarin e Lidhjes Demokratike të Kosovës, Isa Mustafa, shkruan Gazeta Metro.

Ditëve të fundit, përpos prishjes përfundimtare të koalicionit VV-LDK, këto dy parti kanë pasur edhe akuza e kritika në drejtim të njëra tjetrës.

Ka qenë lideri i LDK’së, Isa Mustafa, ai i cili fillimisht doli në konferencë për media dhe konfirmoi se kanë nisur mocion mosbesimi ndaj Qeverisë Kurti, e tash që i kanë mbledhur votat, pritet vetëm mbajtja e seancës në Kuvendin e Kosovës.

Ndërkaq, ai ka reaguar ashpër ndaj ish-partnerit të tij në koalicion edhe përmes disa shkrimeve në Facebook, ku në një të publikuar sot, tha se ka gabuar kur nënshkroi marrëveshje me VV’në.

“Kur dëgjoj disa zyrtar të lartë qeveritar të VV-së se me çfarë papërgjegjësi flasin dhe si konstruktojnë aleanca, më vjen ta gjykoj veten për gabimin që e bëra kur e mbështeta këtë koalicion me këta njerëz që s’kanë asnjë përgjegjësi për pozitat që i mbajnë por vazhdojnë me fushatë dhe propagandë, për çfarë do t’ua kishin lakmi edhe regjimet më diktatoriale”, ka thënë sot Mustafa.

Menjëherë pas kësaj, aktivistët e VV’së janë mobilizuar për të linçuar kreun e LDK’së, përmes komenteve e reagimeve në llogarinë zyrtare të tij, shkruan Gazeta Metro.

Madje, këto linçime siç duket po i organizon vëllai i një figure mjaftë të njohur në Vetëvendosje, i deputetes Fitore Pacolli.

Fitim Pacolli sot me t’u publikuar statusi i Mustafës, u ka bërë thirrje militantëve të VV’së t’i reagojnë me nervozizëm atij.

“T’i reagojmë të gjithë kryetarit të LDK’së me (emotikon të nervozuar) në statusin e tij, kështu e shprehim indinjatën me të për situatën e krijuar”, ka shkruar Pacolli.

Kujtojmë se javën që po lëmë pas, Kryeministri Kurti shkarkoi nga detyra si Ministër i Brendshëm, Agim Veliun, shkruan Gazeta Metro.

Sipas Kryeministrit, një gjë e tillë ndodhi pasi nënkryetari i LDK’së ka hapur panik tek qytetarët rreth situatës së krijuar me koronavirus, si dhe e ka mbështetur idenë e Presidentit Hashim Thaçi për të shpallur gjendje të Jashtëzakonshme.

Kjo ka nervozuar tejmase LDK’në, e cila u deklarua se mos-heqja e taksës 100 përqind, prishja e marrëdhënieve me SHBA’në si dhe shkarkimi i Agim Veliut, janë të papranueshme për këtë parti.

Kështu, partia në krye me Isa Mustafën mori vendim që të tërhiqet nga koalicioni me VV’në e Albin Kurtit duke nisur mocion për rrëzimin e Qeverisë e cila u formua nga këto dy parti./gazetametro.net