Vajza sulmon nënën me shkop druri në Podujevë – përfundon në QKUK nën përcjellje të policisë

Një rast i rëndë i dhunës në familje është regjistruar në një fshat të Podujevës, ku një grua është sulmuar nga vajza e saj.

Ngjarja ka ndodhur gjatë ditës së djeshme, ndërsa rasti është raportuar rreth orës 19:00.

Siç mëson Sinjali, viktima është gjetur me lëndime të dukshme në fytyrë dhe është dërguar për trajtim në urgjencën e qytetit.

Sipas deklarimit të saj, rreth orës 15:00, derisa ndodhej në kuzhinë, është sulmuar me një shkop druri nga vajza e saj.

Sinjali mëson se në momentin e ndërhyrjes policore, në vendin e ngjarjes është hasur edhe e dyshuara, e cila më pas është dërguar me autoambulancë në QKUK, nën përcjellje të policisë, për trajtim të mëtejshëm.

Pas trajtimit mjekësor, viktima është intervistuar në prani të përfaqësuesit të Qendrës për Punë Sociale.

Me urdhër të prokurorit kujdestar, rasti është iniciuar si “Dhunë në familje”.

Rasti është në procedurë.