U prezantua në Evropë, përforcimi i Llapit zbulon objektivat

Llapi ka firmosur edhe me një lojtar në ditën e sotme, duke treguar kështu se është një nga skuadrat më serioze dhe më të koncentruara në përforcimin e skuadrës në këtë afat kalimtar.

Llapi ka transferuar qendër-sulmuesin e njohur, Miran Maksuti, i cili së fundmi ishte pjesë e ekipit të Renovës në Maqedoni.

Maksuti në një prononcim për ‘GazetaBlic’ është shprehur mjaft i lumtur për rikthimin e tij në klubin e Llapit dhe premton se do të japë maksimumin për ekipin e tij të ri.

“Jam mjaft i lumtur që rikthehem përsëri tek skuadra e FC Llapit. Normalisht harmonia në klub, profesionalizmi që ushtrohet nga drejtuesit e klubit më kanë bindur që të kthehem përsëri në këtë skuadër”, tha fillimisht Maksuti për ‘GazetaBlic’.

“Objektivat janë të qarta. Dalja në Evropë dhe titulli kampion”, vazhdoi ai.

Më pas Maksuti tregoi edhe arsyen e largimit nga klubi i Renovës.

“Mos-angazhimi i mjaftueshëm në lojë dhe disa rrethana tjera kanë ndikuar që unë të largohem nga Renova”, zbulon qendër-sulmuesi.

Në fund, lojtari i ri i Llapit ka një mesazh për tifozët “Legjendat”.

“Mesazhi im për “Legjendat” është me na përkrah në çdo ndeshje, pasi janë lojtari ynë i 12’të. Unë dhe të gjithë lojtarët tjerë do të japim maksimumin për t’i përmbushur objektivat”, përfundoi Maksuti.

Vlen të ceket se sulmuesi ishte pjesë e KEK-ut para se të kalonte tek skuadra e Renovës në Tetovë.