U mbajt mbledhje komemorative në nderim të jetës dhe veprës së Sylejman Gashit

Nën përkujdesjen e Kryetarit të Komunës së Podujevës, Shpejtim Bulliqi u mbajt mbledhje komemorative në nderim të jetës dhe veprës së Sylejman Gashit, kryetari i parë i komunës së Podujevës pas lufte, veteran i arsimit dhe veprimtar i dalluar i çështjes kombtare.

Duke vlerësuar angazhimin e tij, kryetari Bulliqi tha se Sylejman Gashi do të mbahet mend për kontributin e tij në organizimin e jetës institucionale të pasluftës në Llap.

“Sylejmani ishte kryetari i parë i pasluftës në Podujevë, në atë kohë kur kishte shumë turbulenca politike, ai ishte aty për të na bashkuar rreth qëllimeve me interes të përgjithshëm. Ai punoi gjatë asaj kohe në rrethana shumë të vështira, por me qetësinë dhe maturinë e tij arriti të menaxhonte jashtëzakonisht mirë situatën e asaj kohe” tha kryetari Bulliqi.

Kryetari Bulliqi foli edhe për kontributin e tij para dhe gjatë luftës “Sylejmani dha kontribut të çmuar edhe në Ushtrinë Çlirimtare të Kosovës si pjesëtar i saj si dhe një prej organizatorëve kryesor të mësimit shqip në shtëpi-shkolla në Podujevë . Pra përveç patriot e atdhetar, ishte edhe intelektual i dalluar që aq shumë e donte dijen e shkencën”.

Në fund, kryetari Bulliqi tha se kishte fatin të punonte për pak kohë me të ndjerin, ndërsa, kujimet me të tha se do t’i mbaj gjithmonë në memorien e tij, duke e kujtuar si një punëtor të dalluar dhe njeri që sakrifikonte për të tjerët.

Fjalë rasti në këtë mbledhje komemoracioni, mbajti edhe bashkëveprimtari i tij, Muhamet Latifi, i cili vlerësoi lartë vepren e Sylejman Gashit, ndërsa tha se ky organizim le të mbetet një akt falënderimi për gjithe atë që qi bëri për çështjen kombtare.

Ndërsa, për kontributin e tij në luftën çlirimtare foli, Fahri Balaj, kryetar i Organizatës së Veteranëve të UÇK-së.

Në fund në emër të familjes Gashi, foli e bija e Sylejmanit, Kumrie Gashi, e cila falënderoi të pranishmit për pjesëmarrjen dhe komunën e Podujevës për organizimin.