U ftuan Kurti edhe Nagavci: Pse dështoi ceremonia e shkollës në Podujevë, për të cilin ishte hapur tender para 1 viti?

Rreth një viti më parë, Komuna e Podujevës hapi tender për ndërtimin e Shkollës Ekonomike “Isa Boletini” në këtë qytet. Rreth një vit pas, komuna arriti që të nënshkruaj kontratë me operatorët dhe të fillojnë punimet, dhe për vendosjen e gurëthemelit u thirr edhe kryeministri Albin Kurti dhe ministrja e Arsimit Arbërie Nagavci. Mirëpo kjo gjë nuk shkoi deri në fund, pasi që Gjykata Komerciale ndaloi çdo gjë. Çfarë ndodhi?

Komuna e Podujevës një vit më parë, saktësisht më 25 prill të vitit 2023, hapi tender për ndërtimin e ri të objektit të Shkollës së Mesme Ekonomike “Isa Boletini”. Vlera e këtij tenderi ishte 2 milionë euro.

Komuna e Podujevës, kishte shpërblyer grupin e kompanive që kishin garuar së bashku, “Konstruktori ING 1969” & “Flori eng” NGA Prishtina, me vlerë të ofertës 2,565,696.26 euro, ani pse kishte edhe kompani të tjera garuese të cilat ofronin çmime më të lira.

Mirëpo, kompanitë e tjera garuese, “Grandelite L.L.L” dhe “Arad 94”, nuk ishin pajtuar me vendimin e Komunës, ku edhe kishin parashtruar ankesë në Organin Shqyrtues të Prokurimit.

Kjo gjë ndodhi në gusht të 2023-tës, ku u mor vendim për pezullimin e aktivitetit të prokurorimit.

Lënda kishte shkuar në rivlerësim.

Tenderi për ndërtimin e shkollës ekonomike vazhdon e vazhdon të bëhej film në vetvete, ku “Konstruktori ING 1969” dhe “Flori eng”, me vlerë të ofertës prej 2 milionë e 565,696.26 euro, u shpallën edhe për të dytën herë fituese, saktësisht më 22 shkurt 2024.

Tenderi i dhënë nga Komuna e drejtuar nga Shpejtimi Bulliqi për grupin e kompanive, tejkaloi çmimin që ishte parashikuar në kontratë, gjithashtu kriter kryesor i tenderit ishe edhe “çmimi më i ulët”.

Tek në muajin qershor, sot më 08.06.2024, u mor vendim që të vendoset gurëthemeli i kësaj shkolle, kur për këtë ceremoni u thirrën edhe kryeministrit Albin Kurti dhe ministria e Arsimit Arbërie Nagavci.

Kjo ceremoni e paraparë sot në Podujevë, dështoi e krejt kjo pasi që Gjykata Komerciale ka 9 ditë ka ndaluar punimet në lidhje me këtë tender.

Komercialja e ka aprovuar në tërësi si e bazuar kërkesa e paditësit ARAD 94 shpk.

Gjithashtu në këtë vendim thuhet se detyrohet Komuna e Podujevës që menjëherë të pezulloj ekzekutimin e kontratës publike.

“Për arsyet e shtjelluara detajisht në padi, i propozon gjykatës që konform nenit 22 par. 6 dhe 7 te LKA-së të marr aktvendim më të cilin aprovohet në tërësi si e bazuar kërkesa e paditësit ARAD 94 shpk për shtyerje të ekzekutimit të vendimit PSH.Nr.2024/0201 i datës 03.05.2024, t& shtyhet ekzekutimi vendimit PSH.Nr.2024/0201 i datës 03.05.2024 deri në marrjen e publike nr.615-23-3422-5-1-1/C997, deri në nxjerrjen e një tjetër vendimi gjyqësor. Detyrohet Komuna e Podujevës që menjëherë pas pranimit të këtij aktvendimi të pëzulloj ekzekutimin e kontratës publike.” – thuhet në vendimin e Komerciales.

Pas kësaj, Komuna e Podujevës doli me një reagim, ku të njëjtët deklaruar se asnjëherë nuk janë njoftuar nga Gjykata Komerciale për një vendim të tillë.

“Arsyeja e shtyrjes së kësaj ceremonie është një vendim i Gjykatës Komerciale, e cila e ka pezulluar përkohësisht ekzekutimin e kontratës lidhur me ndërtimin e këtij objekti. Kontrata për ndërtimin e objektit të Shkollës së Mesme Ekonomike është nënshkruar më 27 maj. Ndërkohë, edhe pse vendimi i Gjykatës Komerciale është marrë më 30 maj, ky institucion nuk e ka njoftuar asnjëherë Komunën e Podujevës me vendimin e saj. Ky vendim i është dërguar nga operatori ekonomik ankues kabinetit të kryetarit të Komunës, z.Shpejtim Bulliqi mbrëmjen e së premtes, por jo edhe nga Gjykata Komerciale.” – thuhet në reagim.