Tre vite radhazi raporti i auditorit i kualifikuar për Podujevën, rastet dërgohen në Prokurori

Komuna e Podujevës ka marrë për të tretin vit me radhë raport të kualifikuar nga Auditori i Përgjithshëm, duke dëshmuar për menaxhim të dobët dhe shkelje të vazhdueshme në përdorimin e financave publike.

Raportet e publikuara tregojnë se gjendja financiare e komunës jo vetëm që nuk po përmirësohet, por, sipas auditorit, “po shkon duke u përkeqësuar dhe thelluar më tej keqpërdorimi i parasë publike”.

Auditori i Përgjithshëm ka bërë të ditur se të gjitha raportet e kualifikuara, përfshirë ato të Komunës së Podujevës, janë dërguar edhe në Prokurorinë e Shtetit për trajtim të mëtejmë.

Ky fakt ka ngjallur shqetësime të mëdha tek qytetarët dhe organizatat e shoqërisë civile, pasi pasqyron mungesë të transparencës dhe llogaridhënies nga menaxhmenti aktual i komunës.