Transportuesit e udhëtarëve Podujevë-Prishtinë i japin fund grevës kundër taksive ilegalë

Podujevë, 22 mars – Përfaqësuesit e 24 kompanive të transportuesve të udhëtarëve në relacionin Podujevë-Prishtinë dhe anasjelltas i kanë dhënë fund grevës dyditore. Kryetari i Shoqatës që përfaqëson këta transportues, Beqir Mustafa, ka thënë se kanë filluar punën mëngjesin e së mërkurës pas arritjes së një marrëveshjeje me Policinë, inspektoratet komunale të Prishtinës dhe Podujevës dhe të Ministrisë së Infrastrukturës për të vendosur katër pika të kontrollit kundër taksive ilegale. Ndalja e kombibusëve dhe veturave që kanë qarkulluar çdo ditë në këtë relacion ka qenë edhe kërkesa e vetme e shoferëve të autobusëve.

kemi ndërprerë grevën dhe sot kemi filluar punën. E kemi bërë një marrëveshje. Na kanë premtuar se do të dalin çdo ditë në aksion deri sa t’i largojnë të gjithë taksitë ilegale, ka thënë Mustafa. “Po, na kanë premtuar që dy pika i qesin këta të Komunës së Prishtinës, dy ata të Podujevës. Njëherë kemi filluar, e tash ta këqyrim”, është shprehur ai.

Edhe zëdhënësi i Komunës së Podujevës, Nami Elezi, ka thënë se pas takimit që kanë pasur pasditen e së martës janë dakorduar që të vazhdohet ndalimi i qarkullimit të transportuesve ilegalë, por tash edhe me Policinë (gjerësisht, sot në “Kohën Ditore”).