Thaçi: Secili të dërgojë letër individualisht në INTERPOL

Presidenti i Republikës së Kosovës, Hashim Thaçi ka thënë se institucionet kosovare i janë drejtuar autoriteteve franceze për aktakuzën ndaj liderit të AAK-së, Ramush Haradinaj, por që përgjigja e tyre ka qenë se “ne nuk përgjigjemi në drejtësi, është çështje e tyre”.

Thaçi është shprehur se ka biseduar me shefin e INTERPOL-it, ku e ka pyetur rreth listës me emrat e personave që u janë ngritur aktakuza, në mesin e të cilëve është edhe Haradinaj. Por, meqë Kosova nuk është anëtare e INTERPOL-it, vetë individët duhet të kërkojnë pastrimin e emrit në listë.

“Ato aktakuza prej disa vendeve të BE-së respektohen, e prej disave jo. Shteti është munduar t`u japë përgjigje këtyre rasteve, si dhe të Haradinajt, që janë në ato lista. Unë në takimin me shefin e Interpol-it kam biseduar për mundësinë e heqjes dhe përgjigja ka qenë të punohet përmes individëve që t`i drejtohen me letra Interpol-it meqë Kosova ende nuk është anëtare e saj. Kemi reaguar në atë masë që kemi treguar qartë se Serbia nuk ka juridiksion mbi Kosovën, se Haradinaj është qytetar i Kosovës, jo i Serbisë. Ky është vazhdimësi e rastit të trenit dhe murit. Në këtë drejtim jemi shumë të vendosur. Nuk kemi kompromis pavarësisht lojërave të ndyra të Serbisë”, ka thënë Thaçi në Klan Kosova.

Ndryshe, Thaçi ka thënë se vendimi i sotëm i gjykatës së Colmarit që Haradinajt t`i shtyhet qëndrimi deri më 6 prill, ka qenë shokues dhe befasues për të gjithë.

Kjo, sepse Franca është shteti që ka qenë pro bombardimeve të NATO-s, si dhe e ka njohur pavarësinë e Kosovës. “Ndërsa sot po ndodhë një paradoks”, ka shtuar ai.

Tutje. Thaçi është shprehur se Haradinaj e ka vendin në familjen e tij dhe në institucionet e Kosovës, kurse ka shtuar se “asnjë shpifje e Serbisë nuk mund ta hedhë poshtë luftën e UÇK-së”.