Tentim vrasja në Peran të Podujevës: Viktima që u plagos është një 43-vjeçar, dërgohet në QKUK

Mbrëmjen e së shtunës, në fshatin Peran të Podujevës, ka ndodhur një plagosje, ku për motive akoma të panjohura, një person është qëlluar me armë zjarri dhe ka pësuar plagë të rënda. Viktima u dërgua në spital për trajtim, teksa ende nuk dihen rrethanat në të cilat ka ndodhur ngjarja. Sinjali ka mësuar detaje të reja për rastin, për të cilin tashmë kanë nisur hetimet.

Burimet nga Emergjenca kanë bërë me dije se viktima është një 43-vjeçar, i cili ka marrë lëndime të rënda trupore dhe është dërguar menjëherë në Qendrën Klinike Universitare të Kosovës për trajtim mjekësor.

Sinjali mëson se incidenti ndodhi në afërsi të shtëpisë së viktimës H.A., ku Policia gjeti gjurmë të gjakut, posa intervenoi në vendin e ngjarjes. Njësitet përkatëse kanë bërë ekzaminimet e nevojshme në lokacionin ku dyshohet se ndodhi plagosja, ndërsa pritet që së shpejti edhe viktima të deklarohet mbi rastin.

Në lidhje me këtë ngjarje, është vënë në dijeni edhe Prokurori i Shtetit, i cili ka urdhëruar që të iniciohet rasti si “Vrasje e rëndë në tentativë” dhe më pas të ndërmerren veprimet e nevojshme hetimore për identifikimin dhe kapjen e të dyshuarve.