Tensione në mbledhjen e LDK-së. Sabri Hamiti – Isa Mustafës: Nuk shkon kështu!

Mbledhja e sotme e Këshillit të Përgjithshëm të Lidhjes Demokratike të Kosovës është përcjellur me tensione të mëdha në momentin kur debati u zhvendos tek çështja e Demarkacionit me Malin e Zi.

Kështu kanë bërë të ditur për “Gazeta Blic” burime brenda kësaj mbledhje.

Sipas këtyre burimeve, tensionet kanë nisur në momentin kur Kryeministri i Kosovës dhe njëherit lideri i LDK-së, Isa Mustafa ka kërkuar mendimet e deputetëve nga radhët e kësaj partie lidhur me çështjen e Demarkacionit, gjë të cilën e ka kundërshtuar deputeti i Kuvendit të Kosovës, Sabri Hamiti, duke thënë se nuk bënë të vëprohet në këtë mënyrë, raporton GazetaBlic.

“Nuk shkon kështu, nuk ka rëndësi këshilli i përgjithshëm për deputetin, kjo punë duhet të kryhet në Kuvend e jo në Këshill të Përgjithshëm. Unë abstenoi dhe ju ftojë me apstenu“, ka deklaruar Hamiti duke qëndruar në këmbë, thonë burimet e njëjta.

Pavarësisht kësaj situate, siç mëson “Gazeta Blic” nga burimet e saj brenda kësaj mbledhje, kreu i LDK-së Mustafa e ka vendosur në votim çështjen e Demarkacionit, kështu duke kërkuar nga ta se a janë pro apo kundër që kjo çështje të procedohet në Kuvend.

“Gazeta Blic” përmes këtyre burimeve mëson se kanë qenë 7 deputetë që kanë abstenuar, pasi që çështja e Demarkacionit është hedhur në votim, kurse pjesa tjetër e deputetëve e kanë votuar.

Mbledhja e Këshillit të Përgjithshëm të LDK-së ka nisur në orën 16:00 dhe ka përfunduar rreth 3 orë më vonë.

Përveç Demarkacionit, çështje tjera që u trajtuan në këtë mbledhje ishin edhe zgjedhjet lokale, për të cilat kreu i LDK-së Mustafa mori vendim që partia e tij të mos ketë kandidatë që janë të akuzuar për korrupsion në garë për zgjedhejt lokale që priten të mbahen në vjeshtën e këtij viti. /GazetaBlic/