Temperaturat e ulëta nuk i ndalin këta shitës në Podujevë (Foto)

Të ftohtit nuk i ka penguar shitësit ambulant ta zhvillojnë biznesin e tyre sot përgjatë trotuareve në rrugën “Afrim Zhitia” e cila gjendet në mes të dy shkollave fillore, asaj “Naim Frashëri” dhe “Shaban Shala” në qytetin e Podujevës.

Banorët e kësaj pjese të qendrës së qytetit të cilët e kanë të vështirë lëvizjen para shtëpive të tyre tregojnë që janë ankuar disa herë pranë organeve komunale por asnjëherë s’kanë hasur në mirëkuptim.

“Neve na ndodhë shumë herë që këta shitës tregtar vijnë në orët e hershme para se të zbardh mëngjesi me qëllim të zënies së vendit më të mirë për ekspozimin e sendeve, dhe në at kohë ka raste  edhe ndezin motorët e ndryshëm për ti provuar duke krijuar zhurma të cilat shqetësojnë familjet përreth”, shprehet një banor i lagjes.

Në Podujevë dita e shtunë tradicionalisht është e njohur si ditë tregu, ku qytetarët e sidomos të moshuarit e kanë shfrytëzuar rastin t’i bëjnë pazaret e tyre për nevojat familjare, e po ashtu edhe për tu takur me ndonjë mik rreth një qaji të ngrohtë rusi. /PodujevaPRESS/