Të rinjtë kosovarë, “me zhig”, që se pritën Vitin e Ri jashtë vendit
Të rinjtë kosovarë edhe këtë fundvit u dëshpëruan nga liderët politikë, pas premtimeve të mëdha për liberalizmin e vizave si “dhuratë” për Krishtlindje.
Ata madje thonë se kjo ëndërr është shuar tash për tash, shkruan IndeksOnline.
XH.K në përfundim të studimeve në Universitetin e Prishtinës, për IndeksOnlinen ka pohuar se asnjëherë nuk i ka festuar festat e fundvitit jashtë territorit të Kosovës.
Sipas saj, edhe po të ekzistonte mundësia e lëvizjes së lirë në shtetet e tjera, kushtet financiare në Kosovë ia vështirësojnë këtë qejf.
“Nuk e kam festuar Vitin e ri kurrë jashtë vendit, nuk ekziston një mundësi e tillë pothuajse as në ëndrra tash për tash. Arsyeja është se s’ki mundësi, edhe nëse i ki kushtet financiare, viza s’ki edhe për me marrë një vizë të duhet kohë e shumë energji për me i mbledh një grumbull dokumente, edhe shumica e pareve që kisha me i shfrytëzuar për pushim, shkojnë qaty për me marr vizën. Dëmi është i madh e për gjeneratat e reja sidomos gati i pariparueshëm. Sidomos kur e mendon se në Kosovë një numër i madh i të rinjve janë pa punë, ose detyrohen të punojmë ka 8 deri 10 e 12 orë për një pagë mujore 200 euro”, ka thënë ajo.
XH.K., shtoi se shumica e të rinjve nuk ëndërrojnë të dalin jashtë vendit për të “shijuar jetën” po për të punuar e për të siguruar të ardhura për një jetë më stabile.
“Përveç që s’munden me ëndërru me dalë e me shëtit, ata mundohen me atë pak pagë që e marrin me dalë krejt me ik prej Kosovës. Paralel me liberalizim të vizave, mendoj se të rinjtë e Kosovës po i dërrmon edhe pamundësia për me ëndërru që me dal jashtë shtetit për qejf, shumica mendojnë me dal të punojmë, me i bë kushtet për një jetë të dinjtetshme. Nuk e di nëse mundemi me situatën në të cilën jemi, me ëndërru për diçka të tillë”, tha jo.
Njësoj sikur kjo, mendon edhe D.B, nga Prishtina.
Djaloshi i cili po përfundon studimet master në Tiranë ka thënë se dëshira për të festuar festat e fundvitit në njërin nga vendet e Europës ka qenë ëndërr e kamotshme e tij.
“Fatkeqësisht, përkundër dëshirës për të përjetuar një festim të Vitit të Ri, në vendet që i ëndërroj, nuk kam pasur mundësi ta përjetoj këtë ndjenjë. Arsyeja tashmë dihet! Izolimi ynë që na bëhet me mos liberalizimin e vizave, pastaj kriteret e vendosura nga ambasadat që për shumicën e rinisë kosovare janë vështirë të përmbushen.
Do ta quaja edhe një ndër ëndërrat e mija më shumë ëndërr e kamotshme!
Izolimi është duke na dëmtuar sepse siç e dim Kosova përkundër që është shtet multietnik, prapë nuk përmbush mjaftushëm nevojën e të rinjëve për të parë atë çka shoqëritë e ndryshme nëpër botë ofrojnë”, ka thënë për IndeksOnline.
Ndërsa, i riu S.A i cili punon në një kompani private ka thënë se liberalizmi i vizave në Kosovë do të thyente një barrikadë në mes kulturave të vendeve.
“Jo këtë vit, por asnjëherë nuk kam qenë që të festoj Vitin e Ri. Qejfi është që të dal të shoh se si festohet në vendet e tjera po ne duhet edhe të i kemi mundësitë. Pastaj ne jemi të izoluar për shkak të liberalizimit të vizave, kjo do të thyente barrierën e madhe pasi që të rinjëve u mundësohet të njofin kultura e tradita të tjera, pastaj mënyrën e festimit etj”, ka thënë ai.
Kujtojmë se, mbi 11mijë qytetarë të Republikës së Kosovës kanë udhëtuar me viza pune drejt Gjermanisë për dy vjet 2017-2019. Përveç Gjermanisë, viza pune kanë lëshuar edhe Sllovenia dhe Kroacia./IndeksOnline/
