Takohen Ramush Haradinaj dhe Behgjet Pacolli

Takimi i sotëm mes kandidatit për kryeministër nga koalicioni PDK-AAK-Nisma, Ramush Haradinaj dhe kryetarit të AKR-së, Behgjet Pacolli, duket të ketë qenë miqësor.

Muharrem Nitaj, anëtar i Kryesisë së AAK-së i ka thënë “Indeksonline” se ka pasur një dakordim mes Haradinajt e Pacollit që institucionet duhet të formohen urgjentisht.

Ai ka shtuar se nuk ka ndonjë marrëveshje konkrete, meqë ka qenë takim konstruktiv i zhvilluar nën frymën e miqësisë.

“Nuk mund të flas për një marrëveshje konkrete, ka plot spekulime të natyrës se është siguruar pajtimi i AKR-së dhe zotit Pacolli. Po flas që ka pasur dakordim për urgjencën e themelimit të institucioneve. Takimi ka qenë konstruktiv në frymën e miqësisë që e kanë ata mes vete. Është diskutuar për urgjencën e krijimit të institucioneve të vendit pas zgjedhjeve”, ka thënë ai.

Nitaj ka konfirmuar se takimi është mbajtur në shtëpinë e Pacollit gjatë ditës së sotme./Indeksonline/