Asociacioni i Komunave Serbe është në harmoni me Kushtetutën dhe ligjet e Kosovës, andaj edhe komunat e kanë të drejtën e bashkëpunimit. Kështu është shprehur për “Indeksonline” njohësi i çështjeve politike në vend, Ramush Tahiri.

Sipas tij, AKS-ja është marrëveshje e arritur në pajtueshmëri të të gjitha palëve në Bruksel dhe si marrëveshje ndërkombëtare, duhet respektuar.

“Çështja e bashkësisë së komunave me shumicë serbe është një obligim i Kosovës që është marë në bisedimet mes Kosovës e Serbisë në Bruksel me ndërmjetësimin e BE-së dhe për të cilën është arritur pajtueshmëri e plotë. Kjo është edhe prej pakos së Ahtisaar-it dhe është edhe në harmoni me Kushtetutën dhe ligjet e Kosovës sepse komunat kanë të drejtë të bashkëpunimit ndërmjet vete në bazë të interesave që ata i përcaktojnë për me i kry funksionet e veta për qëllim të qytetarëve dhe për me e rritë efikasitetin. Pasi ne i kemi 9 komuna me shumicë serbe, është në interes të tyre që të krijohet bashkësia e komunave”, ka thënë ai.

Se kur do të formohet AKS-ja, Tahiri ka thënë se varet sa do të punojë Qeveria dhe Kuvendi, por ai është shprehur skeptik për shkak se Kuvendi akoma nuk e ka nisur mbajtjen e seancave.

Megjithatë, Tahiri thotë se është më e dobishme që AKS-ja të formohet para përfundimit të vitit, sepse sipas tij, Lista Serbe është në Qeveri dhe mund ta prishë atë kur të dojë.

“Qeveria ende është në organizim e sipër dhe Kuvendi nuk po i mban mbledhjet, por kjo punë nuk mund të vallëzojë në pafundësi dhe Qeveria e ka një praktikë juridike sa mundet të vazhdojë pa rezultate konkrete dhe sa mund t`i anashkalojë këto obligime ndërkombëtare. Mendoj që kjo punë nëse kryhet para Vitit të Ri është shumë më e dobishme të kryhet sesa të prolongohet, aq më parë kur Lista Serbe është në Qeveri dhe kurdo që del, prishet Qeveria”, ka deklaruar ai.

Tutje, Tahiri ka thënë se partitë politike në Kosovë duhet të tërhiqen nga politika e “mashallave” (siç e quan ai), sepse nuk mund të anashkalohet e kaluara sa herë që ndonjëra nga partitë e marrin pushtetin.

Tahiri ka përfunduar se AKS-ja është e drejtë që nuk mund ta ndryshojë asnjë Qeveri, meqë është marrëveshje ndërkombëtare./Indeksonline/