Tahiri: Ministrat e Kurtit po sulmojnë Prokurorinë kur zyrtarët e tyre po ndiqen për vepra korruptive

Shefi i Grupit Parlamentar të AAK-së, Besnik Tahiri, ka kritikuar fushatën linçuese të Qeverisë Kurti, ndaj Prokurorisë Speciale.

Siç tha Tahiri, Qeveria po synon që ta sulmojë Prokurorinë, pikërisht në një kohë kur kjo e fundit po arreston zyrtarët e pushtetit nën dyshime për afera korruptive, shkruan gazeta online Reporteri.net.

Kur u deklarua për arrestimin e Ridvan Muharremit dhe dy zyrtarëve të MINT, për aferën me rezerva shtetërore, Kryeministri Kurti paralajmëroi se “rastet e akumuluara tё krimit e tё deponuara nga kjo qeveri nuk do mund t’i fshehin edhe shumё gjatё”, duke iu referuar Prokurorisë Speciale.

Mirëpo, sipas Tahirit, kallëzimet penale të cilat i ka dërguar Qeveria në Prokurori Speciale nuk plotësojnë parametrat e nevojshëm ligjorë për t’u trajtuar.

“Me qëllim të dëmtimit të integritetit të prokurorëve dhe humbjes së besimit ndaj sitemit prokurorial, eksponentë të Qeverisë po dalin me video linçuese, se kinese Prokuroria është e njëanshme, ku si argument po përdorin pikërisht kallëzimet penale të cilat i kishin parashtruar më herët dhe të cilat nuk përmbushnin kriteret ligjore për t’u trajtuar”, tha ndër tjerash Tahiri.

Ministri i Bujqësisë, Faton Peci, dhe Ministrja e Drejtësisë, Albulena Haxhiu, shënojnë dy rastet e fundit të kallëzimeve penale të bëra publike ditëve të fundit.

Peci ka komentuar një kallëzim penal ndaj disa vilave të ndërtuara kundërligjshëm, në pronë të shtetit, në fshatin Stankaj të Rugovës. Njëherit, ka denoncuar edhe disa lokale afariste, të ndërtuara në mënyrë të kundërligjshme që nga viti 2012, në pronë të këtij dikasteri, në lagjen Ulpiana të Prishtinës.

Ndërsa Haxhiu ka folur po ashtu për një pronë shtetërore në Vushtrri, të cilën, në vitin 2020, ish-ministri i Drejtësisë ia kishte dhënë në pronësi një personi fizik. /Reporteri.net/.