Supremja refuzoi 4 ankesa, po shqyrton 5

Gjykata Supreme dje ka pranuar edhe 5 ankesa të reja, të cilat po i shqyrton. E, afatin e fundit për ta bërë këtë, e ka 7 korrikun, kur edhe kalon afati ligjor prej 72 orësh.

Siç konfirmon për gazetametro.net zëdhënësja e Gjykates Supreme, Antigona Uka, gjykata dje ka marrë ankesa nga KNRP, nga kandidati i LAA Vehbi Imeri, kandidatja e AKR’së Myzejene Selamni, Slavko Simic nga Lista Serbe dhe nga tre deputetë të LAA (Besnik Krasniqi, Fadil Aliu dhe Nuredin Ibishi).

KNRP ka bërë ankesë në Supreme kundër vendimit të PZAP lidhur me formularët e përputhjes për subjektin politik, Partia Rome e Bashkuar. Ndërkaq, kandidati Vehbi Imeri është ankuar në Supreme për mospërfshirjen e tri komunave të tjera në rinumërim.

Gjithashtu, bëhet e ditur se kandidatja Myzejene Selmani është ankuar pas vendimit të PZAP’it për t’iu rinumëruar asaj të gjitha votat.

Ndërkaq, Slavko Simic nga Lista Serbe është ankuar në Supreme, duke kërkuar që të përfshihen disa persona që kishin votuar me dokumente të Serbisë. E tre deputetët e LAA, Krasniqi, Aliu dhe Ibishi, u ankuan për vendimin e PZAP’it për rinumërim të pjesshëm.

Ndërkohë, Supremja bën me dije se kanë qenë 4 ankesa të tjera që janë refuzuar. Bëhet fjalë për një ankesë të Listës Serbe, një të BIRN’it, një tjetër të organizatës Demokracia+ dhe një tjetër të koalicionit Vakat, shkruan gazetametro.net.

Ndryshe, Gjykata Supreme ka afat edhe dy ditë që të marrë vendim për ankesat e kandidatëve dhe partive, dhe varësisht nga vendimi, krijohet mundësia e certifikimit të rezultateve të zgjedhjeve të 11 qershorit, të cilat më pas hapin rrugë për krijim të institucioneve./gazetametro/