Skandaloze: Një person flet në emër të kandidates së Vetëvendosjes në Podujevë, duke premtuar shtrimin e asfaltit në këmbim të votës |DOKUMENT

Një rast shqetësues është lajmëruar në redaksinë e PodujevaPRESS në prag të zgjedhjeve komunale në Podujevë. Një person i paidentifikuar është kapur duke komunikuar në emër të një kandidateje për Asamblenë Komunale (emër i njohur për PodujevaPRESS) nga radhët e Vetëvendosjes, duke premtuar shtrimin e asfaltit në një lagje në këmbim të votave.

Sipas informacioneve që ka siguruar PodujevaPRESS, biseda është zhvilluar përmes rrjetit social Messenger, ku ky person është prezantuar sikur po flet në emër të kandidates. Në komunikim, ai premton asfalt dhe përfitime të tjera, gjë që bie ndesh me ligjin dhe përbën shkelje të qartë zgjedhore.

Nuk dihet se a është bërë premtimi në dijenin e kandidates apo është keqperdorur emri i saj.

Ekspertë ligjorë theksojnë se ky veprim mund të konsiderohet si mashtrim elektoral dhe keqpërdorim i besimit të qytetarëve, madje edhe të ketë elemente të veprës penale. Ndërkohë, shpesh here kur ka njoftime të tilla qytetarët shprehen të indinjuar se si ende përdoren premtime të ndaluara dhe manipulime të tilla në fushatë.

PodujevaPRESS ka në dispozicion edhe disa biseda të tjera të ngjashme, por për shkak se përmbajnë pjesë të natyrës private, ato nuk do të publikohen.

Ky rast ka hapur debat të ri mbi mënyrën se si zhvillohet fushata në Podujevë dhe mbi nivelin e manipulimit që përdoret për të siguruar vota.