Skandali i zyrtarit të Kosovës, e lëshon konferencën në Bruksel pa kurrfarë paralajmërimi

Një zyrtar i Qeverisë së Kosovës ka shkaktuar një moment aspak të mirë në një takim me zyrtarë të BE-së dhe vendeve të rajonit. Veprimi i tij, ndoshta mund edhe t’i shkaktojë edhe dëme Kosovës.

Naim Muja, i ngarkuar me rolin e sekretarit për strategji dhe drogave nga Ministria e Punëve të Brendshme, pak para se të merrte fjalën në projektin e Bashkimit Evropian të quajtur “Role of Law”, në kuadër të EMCDDA, e ka lëshuar konferencën pa ndonjë paralajmërim.

Për këtë kanë reaguar edhe zyrtarë të BE-së të cilët kanë thënë se “është për të ardhur keq që ju nuk e shfrytëzuat mundësinë për t’u paraqitur para kolegëve të EMCDDA me gjendjen aktuale”.

Insajderi ka siguruar të plotë dokumentin/ankesën lidhur me zyrtarin Muja ku bëhet e ditur se ai doli pa paralajmërim nga konferenca. Ankesa e siguruar është dërguar nga Ministria e Punëve të Jashtme dhe e Diasporës për Ministrinë e Punëve të Brendshme

“Nga informatat që kemi pranuar sot (16.07.2020) nga Ambasada jonë në Bruksel dhe korrespondencës që ata kanë zhvilluar me zyrtarët relevant të BE-së, kemi kuptuar se pjesëmarrësi i paraparë për aktivitetin në fjalë ka qenë z. Naim Muja (Udhëheqës i Sekretariatit të Strategjive dhe Drogave në MPB), i cili në cilësinë e koordinatorit të Projektit rajonal, IP 7: “Role of Law”, e në kuadër të EMCDDA është dashur që krahas pjesëmarrjes të përgatisë edhe një raport për takimin në fjalë”, thuhet në ankesën në fjalë.

“Gjithnjë sipas informatave që kemi pranuar nga Brukseli, pak para radhës së paraqitjes për prezantim, z.Muja ka lëshuar konferencën pa kurfarë paralajmërimi. Zyrtarët e pranishëm të BE-së e kanë ftuar disa herë gjatë punimit të konferencës përfaqësuesin e RKS, i cili nuk është përgjigjur fare”, thuhet tutje në këtë dokument.

Ministria e Punëve të Jashtme dhe ajo e Brendshme nuk kanë folur lidhur me këtë skandal të bërë nga zyrtari.