Skandal: Një rrëqebull është mbytur pasi u zu në kurth, autori mund të shkojë tri vjet në burg

Një rrëqebull është zënë me kurth në një fshat në Podujevë. Pastaj, dyshohet se kafshën e mbrojtur me ligj e kanë mbytur. Agron Shabani ka dhënë tri versione për kafshën tepër të rrallë në Kosovë. Së pari ka thënë se atë e ka shitur, pastaj e kanë vrarë dhe në fund ka thënë se e njëjta ka ikur. Për gjithë këto veprime llapjani rrezikon të shkojë në burg. Se një kafshë e tillë është rrëqebull e kanë konfirmuar edhe dy ekspertë të kësaj lëmie.

T7 e ka siguruar këtë video. Aty, dikush çuditet me reagimet e rrëqebullit.

Se ky është  rrëqebull e kanë konfirmuar edhe dy ekspertë të kafshëve, të cilët e kanë parë videon.

T7 është duke hulumtuar prej kohësh këtë temë.

Para dy muajve, Agron Shabani, përmes telefonit kishte thënë se rrëqebullin  e kanë mbytur. Pastaj, kishte thënë se e kanë shitur. Mirëpo, më vonë ka thënë se kafsha e mbrojtur me Ligj u ka ikur.

Të njëjtën ditë përmes telefonit, ai ka thënë se këtë kafshë ia ka shitur një personi në Gjilan.

Tash, rrëfimi i tij është krejt tjetër. Kësaj radhe ai tha se rrëqebulli iu ka ikur pasi e kanë zënë.

Megjithatë, ai nuk ka pranuar të flasë para kamerës.

Mirëpo, duket se Agroni s’ka qenë në dijeni se mund të përfundojë në burg vetëm pse ka zënë me kurth rrëqebullin.

Kjo kafshë është e mbrojtur me Ligj në Kosovë.

Dënimi për këtë vepër, paraqitet edhe në nenin 359 të Kodit Penal.

Rrezikun që  një veprim i tillë të dënohet e konfirmon edhe drejtori i Drejtoratit Qendror të Inspeksionit për Pylltari dhe Gjueti, Besim Zogu.

Ai sqaron se një kafshë e tillë ka rëndësi edhe në aspektin historik për Kosovën.

Zogu tregon se një kohë është menduar madje se kjo kafshë është zhdukur krejtësisht nga Kosova.

Në gjithë Ballkanin, ekzistojnë vetëm 35 rrëqebuj, ndërsa vetëm 5 janë në Kosovë.