Si ndodhi ngjarja tragjike ku u vra llapjani në Serbi

Dy të rinjë kosovarë të hënën, morën rrugët ilegale përmes të cilave tentonin të mbërrinin deri në Gjermani, por atyre iu ndodhi një e papritur në kufirin Serbi-Kroaci.

Ata hasën në disa emigrantë që dyshohet të jenë nga Afganistani e të cilët fillimisht tentuan t’i plaçkisnin e më pas i sulmuan me thikë, plagëve të së cilës nuk i mbijetoi një 19-vjeçar nga Podujeva e që më vonë u kuptua se bëhet fjalë për Shqipron Muçiqin.

Fillimisht të njëjtit u ndalën në Serbi, prej ku u deshën të kalonin tinëz, në Kroaci. Këtë e bënë në zonën kufitare Batrovci, të hënën në mbrëmje, njofton Klan Kosova.

Por, pasi mbërrin në Kroaci, u kapën nga Policia, ku pas intervistimeve dhe procedurave të zakonshme, u kthyen në Serbi.

Jo fort thellë në territorin e këtij shteti, u ndeshën në një grup migrantësh. Sipas B.H. ata deshën t’i plaçkisin kosovarët.

Në përleshje me ta, djemtë u ndanë. Vushtrriasi ia doli të ikë e llapjani jo, pasi u ther me thikë nga siç raportohet, një emigrant afgan,  19-vjeçari Shqipron Muçiqi vdiq në vend, derisa trupi i tij u konfirmua të jetë në morgun e Novi Sadit.

Vushtrriasi ndërkaq, u kthye të enjten në Kosovë dhe ia rrëfeu krejt këtë ngjarje televizionit, teksa të njëjtën e tregoi edhe tek autoritetet vendore.

Por, para se të vijë në Kosovë, ai tha se u përcoll për në stacionin policor në Shid, ku përmes fotografive arriti ta indentifikojë njërin nga sulmuesit.

Atë me shumë gjasë mund ta njohin edhe shoferët e kamionëve që prisnin në rradhë në këtë pikë kufitare atë natë. Njëri nga ta u tregoi mediave në Serbi çfarë pa.

“Pashë një grup njerëzish që u gjendën në rrugën përballë kufirit dhe një burrë duke vrapuar. Pak më vonë, mes kamionëve, pashë një tjetër të ri që kishte rënë. Nuk isha i sigurt se çfarë po ndodhte dhe zakonisht nuk dalim nga kamioni në këtë pjesë të rrugës, veçanërisht natën, sepse ka emigrantë të fshehur në zonë”, tha ai.

Lajmi për ngjarjen e hidhur të 19-vjeçarit iu kumtua të premten falmijarëve të tij, nga B.H.