Si ndërroi strategjia e Vjosa Osmanit për t’ia marrë postin Mustafës

Në maj të 2015’ës, pengimin për të kandiduar për të parën e LDK’së, Vjosa Osmani e quante edhe si ‘vdekje të LDK’së’. Madje, ajo nuk kishte kursyer as kritikat e ashpra publike ndaj kreut të tashëm të LDK’së, Isa Mustafës.

Bile, Osmani e kritikonte kryeministrin në shkuarje se po detyronte delegatët që ta votojnë, siç thoshte ajo, duke ia kushtëzuar edhe vendet e punës, shkruan gazetametro.net.

E, ‘rebelizmin’ e 2 viteve më parë, deputetja e ardhshme e Kuvendit duket se e ka konvertuar në ‘diplomaci’, duke synuar ta përgatis terrenin duke gjetur mbështetjen brenda partisë.

Ndërkaq sot, ajo në një intervistë për REL’in, u shpreh tejet e rezervuar për të treguar aspiratat e saj drejt marrjes së kreut të partisë. Ajo ka thënë madje, se nuk ka rëndësi posti, për të cilin nuk mendonte krejt njësoj 2 vite më parë.

‘Sikur çdo herë tjetër që e kam thënë, e tëra që unë duhet ta përsëris është që nuk ka rëndësi posti që e kam, me rëndësi është që unë të jem pjesë e një procesi të ndryshimeve pozitive dhe reformave të thella në LDK’, ka thënë Osmani.

Madje, gruaja më e votuar në Kosovë, shkon deri aty sa thotë se e tëra që ajo do, është të jetë një ‘anëtare e devotshme e LDK’së’.

Por, duke pasur parasysh ndryshimin e diskursit të Vjosa Osmanit për këtë çështje, del se deklaratat e fundit të saj janë një strategji e re për të shkuar deri te kreu i partisë./gazetametro/