Si mund t’i marrin shtesat prej 100 eurove fëmijët dhe pensionistët

Ministri i Financave, Hekuran Murati në konferencën për media pas mbledhjes së Qeverisë ka folur për shtesat prej 100 eurove për fëmijët dhe pensionistët.

Ai thotë se nuk ka nevojë për aplikim për këto shtesa, pasi ato do të ndahen sipas listës ekzistuese.

“Sa i përket këtyre dy masave nuk ka nevojë për aplikim për ata që janë ekzistues në skema. Të gjithë pensionmarrësit këtë të premte do të marrin pensionet e rregullta, ndërsa ditët në vijim pas përgatitjeve teknike do të njoftohen se kur do të bëhet transferi për shtesën prej 100 euro.

Ngjashëm edhe për nënat dhe prindërit që marrin shtesa për fëmijët, do të njoftojmë me kohë pra gjatë ditëve në njoftim se kur do të procedohet shtesa prej 100 euro e njëhershme për të gjithë fëmijët në kuadër të shtesës së rregullt që ata i marrin shtesat për fëmijët. Transferi bëhet në llogaritë ekzistuese. Nuk ka nevojë të bëhen ndryshime të tjera”, tha ministri.