Shtylla elektrike po ua rrezikon jetën nxënësve e kalimtarëve në këtë fshat të Podujevës |PAMJE

Rreth 500 nxënësve që ndjekin mësimet në shkollën “Kongresi i Manastirit”, në Gllamnik të Podujevës, u rrezikohet jeta çdo ditë. Gjithë kjo shkaku i një shtylle elektrike të vjetruar që gjendet para kësaj shkolle, e që mbahet vetëm me një dru. Përveç nxënësve, jeta i rrezikohet edhe secilit qytetar që kalon kësaj rruge. Në Komunën e Podujevës thonë se janë të informuar për rrezikun që paraqet kjo shtyllë, derisa deklarojnë se do të intervenojnë sa më parë për zgjidhjen e këtij problemi.

Shtylla elektrike e vjetruar që gjendet në oborrin e Shkollës “Kongresi i Manastirit”, në Gllamnik të Podujevës, po rrezikon jetën e shumë nxënësve që vijojnë mësimet në këtë shkollë.

Secilit prej nxënësve që hynë apo del nga objekti i kësaj shkolle rrezikohet nga kjo shtyllë, që aktualisht mbahet vetëm me një dru.

Përveç nxënësve, jeta po u rrezikohet edhe kalimtarëve të tjerë e vozitësve që kalojnë përgjatë kësaj rruge.

Shqetësime për gjendjen e kësaj shtyllë kanë ngritur edhe në Drejtorinë e Shkollës.

Drejtori i Shkollës “Kongresi i Manastirit”, Ajet Ajeti i ka thënë Gazetës Express se ata kanë bërë disa herë ankesë që të rregullohet shtylla, por ato nuk janë marrë parasysh.

Madje, thotë se në oborrin e shkollës që drejton kishin dashur që të vendosnin edhe trafo, por se ai nuk e kishte lejuar një gjë të tillë.

“Kemi ba ankesë me shkrim e me gojë, por nuk është marrë parasysh. Janë arsyetuar se është duke u rregulluar rruga. Ajo shtyllë është aty, që prej se ka fillu me u ndërtu rruga. Madje, patën dashtë me vendosë edhe trafo në oborr të shkollës, vetëm se nuk i pata lejuar”, tha ai.

Ajeti deklaron se shtylla elektrike është në gjendje të tillë që një vit. Por, thotë se askush nuk e ka ndërmarrë ndonjë veprim për ta ndërruar.

Shkolla “Kongresi i Manastirit” në Gllamnik

E se kjo shtyllë po e rrezikon jetën e nxënësve tash e sa kohë, janë të njoftuar edhe në Komunën e Podujevës, përkatësisht Drejtorinë për Arsim.

Zëdhënësi i Komunës së Podujevës, Nazmi Elezi i ka thënë Gazetës Express se Drejtoria Komunale e Arsimit është e njoftuar për rrezikun që paraqet shtylla e rrjetit elektrik te oborri i kësaj shkolle.

Elezi deklaron se Drejtoria komunale e Arsimit do të kërkojë nga KEDS-i që sa më parë të intervenojë në zgjidhjen e këtij problemi.

“Komuna është e informuar se me kërkesën e drejtorisë së shkollës KEDS-i ka intervenuar, duke i vendosur shtyllës një shtyllë mbrojtëse të përkohshme. Ndërkohë drejtoria e shkollës ka bërë një kërkesë me shkrim, përmes së cilës kërkon që kjo shtyllë, e cila paraqet rrezik, të zëvendësohet me një shtyllë të re. Edhe Drejtoria komunale e Arsimit do të kërkojë nga KEDS-i që sa më parë të intervenojë në zgjidhjen e këtij problem”, ka thënë Elezi.

Por, edhe pas më shumë se gjashtë muajve gjendja e kësaj shtylle vazhdon të mbetet e njëjtë, që nga koha kur edhe ishte vendosur.

Express ka dërguar pyetje edhe në KEDS që të marrë informacione se kur do të ndërrohet kjo shtyllë elektrike, por në këtë institucion nuk kanë kthyer përgjigje. /Gazeta Express