Shtyhet sërish procesi gjyqësor për ndërmarrjen FAN në Podujevë

Ndonëse kishin monitoruar përmbushjen e zotimeve të investimeve në ndërmarrjen FAN, njësia monitoruese nuk kishte mundur të aplikonte masat ndëshkimore ndaj blerësit pa miratimin e bordit të AKP-së.

Kështu ka thënë të mërkurën, në shqyrtimin gjyqësor, e akuzuara në këtë rast Melita Ymeraga.

Për hipotekimin e kësaj ndërmarrjeje, Ymeraga ka thënë se ka qenë e informuar vetëm kur është marrë në pyetje nga prokuroria.

Ymeraga ka qenë konfuze gjatë deklaratës së saj për takimin që kishte pasur kjo njësi me sindikatën e punëtorëve të ndërmarrjes FAN.

I akuzuari tjetër në këtë rast, Ardian Kelmendi, ka mohuar të gjitha pikat e aktakuzës, me të cilat e ngarkon Prokuroria Speciale.

Vazhdimi i seancës është shtyrë për 17 tetor, sepse njëri anëtar i trupit gjykues ka qenë pjesë e një seance tjetër të caktuar në kohën e njëjtë.

Gjykimi në rast është drejt fundit, derisa pas dy seancash tjera, pritet të nisin fjalët përfundimtare.

Gjykimi për privatizimin e fabrikës “FAN” është rast i shënjestruar për liberalizimin e vizave. Në këtë rast gjyqësor, deputeti i LDK-së, Naser Osmani, bashkë me 6 persona të tjerë, po gjykohen në lidhje me privatizimin e fabrikës “Fan” në Podujevë.