Shtohet presioni i BE-së për taksën, ja kush pritet të vijë në Kosovë

Vendimi i Qeverisë së Kosovës për taksën 100% ndaj produkteve të importuara nga Serbia, kishte ngjallur reagime të shumta.

Ndër to, kishte reaguar edhe Përfaqësuesja e Lartë e Bashkimit Evropian, Federika Mogherini.

Mogherini kishte insistuar për heqjen e taksës qysh nga dita që ajo hyri në fuqi, por kjo ‘këshillë’ nuk ishte ndjekur nga qeveritarët kosovarë.

Kryeministri Haradinaj në prononcime të mëhershme për media, kishte thënë se Kosova do ta tërhiqte vendimin për taksën kur të njihej si shtet i pavarur dhe sovran nga Serbia, shkruan Ballkani.info.

Të njejtin mendim me Mogherinin, e kishte edhe komisioneri i BE-së për Politikat Evropiane të Fqinjësisë dhe Negociatat e Zgjerimit, Johannes Hahn.

Hahn gjatë vizitës së tij në Kosovë, në një konferencë për media kishte thënë se taksa vetëm sa do të dëmtonte raportet mes dy shteteve.

Mogherini mesazhin e saj e përcjelli edhe në takimin me Ekipin Negociator për dialog me Serbinë, gjatë takimit të mbajtur në Bruksel ditën e djeshme.

Por si duket ‘këmbëngulja’ e Qeverisë do të vazhdojë, pasi që asnjë veprim në lidhje me taksën nuk është ndërmarrë së fundmi, përcjell Ballkani.info.

Në anën tjetër, një burim diplomatik nga Brukseli, i ka konfirmuar Klan Kosovës se Komisioneri Hahn, po heziton të vizitojë prapë Kosovën pas takimit të tij të fundit me kryeministrin Haradinaj. Nga ky burim është mësuar se së shpejti Prishtinën pritet ta vizitojë Angelina Eichhorst, e cila është drejtore e Shërbimit për Punë të Jashtme në zyren e Federika Mogherinit. /Ballkani.info