Shpenzoi mbi 2 mijë euro derivate edhe pse nuk është punonjës i Ministrisë

Në Ministrinë për Kthim dhe Komunitete, veturat zyrtare shfrytëzohen edhe nga njerëzit që nuk punojnë fare në këtë institucion.

Madje ministria në fjalë paguan edhe shuma të mëdha parash në derivate për vetura, të cilat shfrytëzohen nga personat që nuk punojnë në MKK.

Të paktën kështu është gjetur nga Raporti i Auditorit për vitin 2017, ku është vërejtur se në një rast janë shpenzuar mbi 2 mijë euro në derivate vetëm për vitin e kaluar, për veturën që e ka shfrytëzuar dikush që nuk punon fare në Ministrinë për Kthim dhe Komunitete.

“Në UA 03/2008, janë përcaktuar kategoritë e zyrtarëve që kanë të drejtë shfrytëzimin e veturave zyrtare në kohëzgjatje 24h. MKK, nuk kishte respektuar këtë udhëzim, duke lejuar që përmes një vendimi të lëshuar në gusht 2015, t`i mundësohet shfrytëzimi i veturës zyrtare 24h, personit i cili nuk është punonjës i ministrisë. Vlera e karburanteve të paguara nga ministria për këtë veturë në vitin 2016 ishte 2,352€. Gjithashtu, nuk kishte evidenca mbi mënyrën e shfrytëzimit të saj”, thuhet në raportin e Auditorit.

Madje vendime të tilla për përdorimin e veturave zyrtare, u janë lëshuar edhe pesë këshilltarëve politik si dhe shefit të kabinetit të ministrit, edhe pse shumica nuk plotësojnë fletëudhimet për shfrytëzimin e automjeteve.

Shkelje tjetër e gjetur në këtë ministir është edhe tejkalimi i afatit ligjor për pozitat e mbuluara me Ushtrues Detyre.

Sekretari i përhershëm në këtë institucion mbulohet me ushtrues detyre që nga viti 2013, edhe pse ligji thotë se ushtruesi i detyrë nuk mund të emërohet për periduhë më të gjatë se tre muaj, njofton lajmi.net

“Sipas ligjit për shërbimin civil, neni 30, në rast të pozitave të lira, Ushtruesi i Detyrës (UD) nuk mund të emërohet më gjatë se tre (3) muaj. Në MKK, pozita e Sekretarit të Përhershëm mbulohet me ushtrues detyre që nga viti 2013 dhe ajo e Drejtorit të Departamentit për Politika dhe Analiza nga viti 2014. jo kishte ndodhur, për shkak se konkurset e shpallura për pozitën e Sekretarit të Përhershëm ishin anuluar pasi që aplikantët nuk i kishin përmbushur kriteret e caktuara. Ndërsa pozita e Drejtorit të Departamentit për Politika dhe Analiza nuk plotësohet për shkak se me Akt emërim kjo pozitë i takon personit që aktualisht është U.D. në pozitën e Sekretarit të Përhershëm”, ka gjetuar auditori.