Shpend Ahmeti fajëson matësit e Ambasadës Amerikane – thotë se gjenden ne pjesën më të ndotur të Prishtinës

Kryetari i Prishtinës, Shpend Ahmeti, ka shkruar një reagim, për ndotjen në Prishtinë. Ka thënë se po bisedon me Qeverinë dhe institucionet tjera për zvogëlimin e ndotjes. Ka thënë se po bëhen plane për zvogëlimin e ndotjes nga veturat dhe termocentralet.

Madje, Shefi i Prishtinës, ka gjetur edhe fajtorin pse po dalin të dhëna kaq të këqija për ajrin në Kryeqytet. Ka thënë se matësit e Ambasadës Amerikanë ndodhen në pjesën më të ndotur të Prishtinës prandaj po dalin të dhëna të tilla.

Ahmeti ka shkuar edhe më tutje duke thënë se ndotja e ajrit është edhe për shkak se situatë e tillë po mbretëron në Maqedoni e Buillgari.

“Komuna do të vazhdojë të merr masa afatshkurte dhe afatmesme në përputhje me vlerësimet dhe analizat e të gjitha institucioneve përgjegjëse në Republiken e Kosovës. Javën tjeter mund të priten reduktime në trafik për shkak të gjendjes momentale. Kjo gjendje është e rëndë edhe për shkak te kushteve atmosferike që janë paralajmëruar për Kosovë, Maqedoni e Bullgari”, ka shkruar Ahmeti, në Fb.

Cilësia e ajrit në kryeqytetin kosovar ka arritur në një nivel alarmant, duke tejkaluar të gjitha standardet e rekomanduara.

Kjo gjendja i ka shtyrë ekonomistët Lekë Musa e Berat Rukiqi që ta marrin një iniciativë të përbashkët. Këta të dy kanë bërë publike një letër me anë të cilës kërkojnë nga Qeveria e Kosovës që çështja e ajrit të behët prioritet.

“Kërkesa jonë është që të bëhet prioritet parësor përmirësimi i cilësisë së ajrit në tërë Kosovën, pa dallim fshati apo qyteti. Liria dhe demokracia e fituar që 17 vite nuk ka kurrfarë kuptimi në rast se këto përmirësime nuk ndihen nga qytetarët e vendit”, thuhet në letrën e tyre.

Gazetari, Adriatik Kelmendi ka drejtuar pyetje në adresë të udhëheqësve të vendit dhe të Shpend Ahmetit pikërisht për këtë çështje duke thënë “a jeni normalë”?. Por ata nuk po thonë asnjë fjalë të vetme. Vazhdojnë të heshtin.

Qytetarët po vazhdojnë të përdorin maska për t’u mbrojtur nga kjo ndotësi, përderisa askush nuk po del me një zgjidhje apo ide më të shpejt për përmirësimin e cilësisë së ajrit.

Ndërsa, ministrja e Ambientit, Albena Reshitaj u lajmërua nga Estonia dhe arsyetoi gjendjen duke thënë se është problem i trashëguar dhe se kjo çështje nuk mund të zgjidhet me shkop magjik.

Postimi i plotë i Ahmetit:

Ditëve dhe javëve të fundit Prishtina po ballafaqohet me nivele të larta të ndotjes, posaçërisht në grimcat 2.5 mm të cilat po publikohen nga matësi i vendosur nga Ambasada Amerikane në Arbëri/Dragodan. Kjo është pika më e ndotur në Prishtinë për shkak të afërsisë me Termocentralet në Obiliq.

Edhe në pikat tjera që i kemi vendosur si komunë vërehet një gjendje më e rëndë por në bashkëpunim më Ministrinë e Mjedisit po punojmë për verifikimin e saktë të informatave.

Burimet e ndotjes mund të ndahen në disa pika.

1. Termocentralet

2. Metodat alternative të ngrohjes (djegia e drunjve dhe qymyrit)

3. Trafiku

4. Kushtet atmosferike

5. Gjelbërimi i pamjaftueshëm dhe ndërtimet

Si Komunë janë disa politika që mund ti ndikojmë e disa të tjera që nuk mundemi (termocentralet nuk mund ti levizim).

Në aspektin afatmesëm kemi disa projekte që do ta përmirësojnë gjendjen

1.zgjerimi i Ngrohjes qendrore – pervec fazes se tanishme ku me financimin e qeverise gjermane dhe Komisionit Evropian do te kyçen edhe mbi 5 mijë njesi banesore, në takim me qeverinë kemi kërkuar dyfishimin e kapaciteteve në KeK (kosto rreth 25 milion euro) që brenda 5-7 viteve do të zvogëlonte dukshëm ngrohjen alternative

2. Reforma e Transportit Publik

3. Ngritja e vazhdueshme e hapësirave gjelbëruese

Në takim me minstren Reshitaj kemi diskutuar edhe hapat afatshkurtër e ku ne si komunë pasi të marrim të dhënat zyrtare nga Ministria do të mund të mbyllnim rrugë të kryeqytetit për qarkullim (pervec transportit publik) në orare të caktuara. Edhe pse, për shkak të pozitës së Prishtinës, ndotja më e madhe është në mbrëmje kur nuk ka qarkullim të veturave.

Sa për informatë:

1. Informatat zyrtare mbi gjendjen e ajrit i jep Agjencia për Mbrotjen e Mjedisit

2. Këshillat shëndetësore i jep Instituti për Mbrojtjen e Shëndetit Publik.

Komuna do të vazhdojë të merr masa afatshkurte dhe afatmesme në përputhje me vlerësimet dhe analizat e të gjitha institucioneve përgjegjëse në Republiken e Kosovës. Javën tjeter mund të priten reduktime në trafik për shkak të gjendjes momentale. Kjo gjendje është e rëndë edhe për shkak te kushteve atmosferike që janë paralajmëruar për Kosovë, Maqedoni e Bullgari.

I bëj ftesë qeverisë që të mbledh të gjitha institucionet përgjegjëse përfshi komunat e prekura për të disktuar masat e mundshme afatshkurte