Shpejtim Bulliqi shfaqet me retorikë për borën, por ligji i kërkon punë pa dallim moti

Kryetari i Komunës së Podujevës, Shpejtim Bulliqi, ka publikuar një njoftim në rrjetet sociale duke thënë se “as bora nuk e ndal”, teksa ka bërë me dije nisjen e punimeve për ndërtimin e aneksit të Shkollës “Naum Veçilharxhi” në fshatin Llapashticë e Epërme. Sipas tij, ky investim bëhet në kuadër të vizionit të komunës për mësimin gjithëditor.

Megjithatë, reagimet nuk kanë munguar. Kritikët thonë se Bulliqi po tenton ta paraqesë si heroizëm një punë që është detyrim ligjor i tij, pavarësisht motit. Investimet në shkolla, rrugë apo projekte të tjera komunale nuk janë as dhuratë dhe as favor personal, por obligime që dalin nga funksioni i tij si kryetar komune dhe që duhet të përmbushen si në kohë me diell, ashtu edhe në shi e borë.

Ky lloj komunikimi, sipas disa qytetarëve, tregon më shumë për stilin e marketingut të pushtetit lokal sesa për seriozitetin e qeverisjes komunale. Ata theksojnë se është e rëndësishme të shihet cilësia e projekteve dhe përmbushja e premtimeve, e jo deklaratat që tentojnë të ngjallin emocion me retorikë të panevojshme.

Po ashtu, edhe emrin e shkollës ‘Naum Veqilharxhi’ e ka shkruar gabim si ‘Veçilharxhi’.