Shpejtim Bulliqi me bashkëpunëtor vizitë zyrtare në Austri

Kryetari Bulliqi zhvilloi takim me Kryetarin e Parlamentit të Austrisë së Epërme, kështu thuhet në njoftimin e zyrës për informim të komunës së Podujevës, transmeton PodujevaPRESS.net

Kryetari i komunës, Shpejtim Bulliqi bashkë me drejtorin për Buxhet dhe Financa, Fatlum Osmani, drejtorin e Bujqësisë, Pylltarisë dhe Zhvillimit Rural, Fatmir Rudari dhe drejtorin për Planifikim e Zhivillim Ekonomik, Vigan Salihu po qëndrojnë për vizitë zyrtare në Austri.

Ata sot janë pritur në takim nga Kryetari i Parlamentit të Austrisë së Epërme(një nga tetë republikat austriake), z. Max Hiegelsberger, me të cilin kanë diskutuar që nga situata politike në Kosovë, fushën e arsimit, bujqësisë dhe zhvillimit ekonomik.

Kryetari Bulliqi tha se “Sektori i bujqësisë është një prej sferave me potencial të madh zhvillimi e nga vendet mike si Austria mund të marrim shumë praktika të dobishme që mund t’i përdorim në vendin tonë. Në këtë takim gjithashtu paraqita kërkesën që studentëve të dalluar llapjanë t’ju ofrohen bursa studimi në universitetet prestigjioze austriake me qëllim të përgatitjes së tyre profesionale, e avancimit akademik”.

Gjatë këtyre ditëve delegacioni i komunës do të takohet edhe me Kryetarin e Linzit, shoqata të afaristëve e shoqata të fermerëve, si dhe do të marrë pjesë në forume ekonomike.