Shpejtim Bulliqi: Komuna ka investuar në rrjetin e ujësjellësit, furnizimi me ujë mbetet kompetencë e KRU “Prishtina”

Kryetari i Komunës së Podujevës, Shpejtim Bulliqi, ka mbajtur konferencë për media ku ka sqaruar situatën rreth furnizimit me ujë të pijes në qytet dhe disa lagje përreth.

Ai theksoi se, ndonëse furnizimi me ujë është kompetencë e Kompanisë Rajonale të Ujësjellësit (KRU) “Prishtina”, Komuna e Podujevës ka investuar në përmirësimin e infrastrukturës së rrjetit të ujësjellësit.

Sipas Bulliqit, një nga investimet kryesore ka qenë zëvendësimi i gypit kryesor që furnizon qytetin nga fabrika në Shajkoc. “Gypi ekzistues me diametër 40 cm, i cili ishte reduktuar në 24 cm në afërsi të Lagjes së Dëshmorëve, është zëvendësuar me gyp të ri 40 cm për ta furnizuar rezervuarin. Me këtë investim është përmirësuar dukshëm furnizimi me ujë, edhe gjatë stinës së verës”, deklaroi ai.

Kryetari bëri të ditur se Lagjja “Ali Ajeti”, e cila për më shumë se 20 vite është furnizuar me ujë përmes gypave të azbestit, tashmë ka përfituar nga zëvendësimi i rrjetit në bashkëpunim me KRU “Prishtina”. Megjithatë, ai theksoi se për shkak të konfiguracionit më të lartë gjeografik të kësaj lagjeje, problemet me furnizim shfaqen herë pas here, sidomos kur bie niveli i ujit nga gypi kryesor që vjen nga Shajkoci.

Bulliqi shtoi se është në kontakt të vazhdueshëm me zyrtarët e KRU “Prishtina” dhe se janë realizuar disa takime me kryeshefin ekzekutiv dhe drejtorët teknikë lidhur me këtë çështje. Ai nënvizoi se në momentet kur bie furnizimi nga kanali i Ibër Lepencit, rritet furnizimi me ujë nga Fabrika e Shajkocit për Prishtinën, ndërsa zvogëlohet për Komunën e Podujevës.

Sa i përket lajmit të publikuar në disa media për raste të dyshuara me zgjebe, kryetari Bulliqi mohoi një gjë të tillë, duke u bazuar në raportin e specialistëve mjekësorë që kanë verifikuar situatën. “Nuk qëndron ajo informatë. Do të bëhet edhe denoncim në organet e rendit për deklarim të rrejshëm”, u shpreh ai.

Komuna e Podujevës ka bërë thirrje për bashkëpunim institucional dhe për informim të saktë të qytetarëve lidhur me çështjet që prekin shëndetin publik dhe furnizimin me ujë.