Shpejtim Bulliqi: Agim Veliu është konsumuar tej mase, nuk ka se çka ju ofronë qytetarëve të Podujevës.

Ish-deputeti i Lidhjes Demokratike të Kosovës, Shpejtim Bulliqi, dhe njëherit njëri ndër kundërshtarët më të fuqishëm, të demarkimit mes Kosovës dhe Malit të Zi, sipas Komisionit Shtetëror, ka deklaruar se do të bashkëpunon me të gjithë ata, të cilët punojnë për të mirën e qytetarëve dhe të vendit, duke e dhënë në dispozicion profesionalizmin dhe punën e tij. Në një intervistë për kosova.info, ai ka veçuar se PAN i ka fituar zgjedhjet nacionale, dhe z. Haradinaj është i nominuari i tyre për Kryeministër të vendit.

“Të tjerët gjithmonë janë thirrur në respektim të institucioneve, dhe besoj që këtë do ta bëjnë dhe do krijohet mundësia, që në mënyrë demokratike, të zgjidhen institucionet e vendit, sepse vendi ka nevojë që sa më shpejtë të ndodhë kjo punë”, ka deklaruar Bulliqi.

Kurse, sa i përket një oferte të përmendur ditëve të fundit nga Lëvizja Vetëvendosje, për mundësinë e kandidimit të tij, për kryetar të komunës së Podujevës, Bulliqi ka hedhur poshtë çdo bashkëpunim me këtë subjekt politik, duke thënë se “unë nuk kam pasur ndonjë ide të tillë, edhe pse ndoshta disa nga subjektet politike edhe kanë shprehë një interesim të tillë”.

Kosova.Info: Z. Bulliqi, ditëve të fundit është përmendur se keni ofertë nga Lëvizja Vetëvendosje për mundësinë e një bashkëpunimi me këtë subjekt politik, pikërisht për mundësinë e kandidimit tuaj për kryetar të komunës së Podujevës. Sa është e vërtetë kjo, që ju ta braktisni subjektin politik që tashmë i takoni LDK-së, për mundësinë e kandidimit tuaj për kryetar të kësaj komune nën ombrellën e Lëvizjes Vetëvendosje?

Shpejtim Bulliqi: Unë ç’është e vërteta i kam lexuar edhe një numër shkrimesh nëpër portale të ndryshme rreth kësaj tematike. E vërteta qëndron, se unë nuk kam pasur ndonjë ide të tillë, edhe pse ndoshta disa nga subjektet politike edhe kane shprehë një interesim të tillë. Unë jam deklaruar edhe më herët që nuk jam prej atyre, që kam kërkuar me çdo kusht poste shtetërore për të mbetur në partinë ku jam apo edhe për të ikur diku tjetër. Mendoj që momentumi i caktuar edhe i kërkon njerëzit e duhur në një pozitë të caktuar. Komuna e Podujevës ka pasur nevojë kësaj radhe, më tepër se çdo herë, që të ketë reformim kuadrosh, duke pasur parasysh faktin se njerëzit e njëjtë për më se 18 vite qeverisin me kë të komunë, dhe besoj që qytetarët kanë pritur diçka të tillë për të reformuar pushtetin lokal. Diçka e tille nuk ndodhi, dhe për fat të keq mbetet ta shohim se si do reflektojnë ata në këtë proces.

Kosova.Info: Nëse nuk e braktisni Lidhjen Demokratike të Kosovës, a do ta mbështetni kandidatin tashmë të propozuar nga LDK, për kryetar të komunës së Podujevës, z. Agim Veliun?

Shpejtim Bulliqi: E thashë edhe më lartë që komuna jonë kësaj radhe, ka pasur nevojë më shumë së çdo herë tjetër të bëjë reforma për qeverisjen lokale. Arsyeja është e thjeshtë. që ky pushtet gjatë kohë, qeveriset nga të njëjtit individ, të cilët mendoj se janë konsumuar tej mase, sa më tutje nuk kanë se çka ju ofrojnë qytetarë ve të Podujevës. Me gjithë ata kandidat në fjalë janë caktuar nga niveli qendror duke mos e konsultuar strukturën e degës dhe nëndegëve, që është edhe rast i parë që veprohet kësisoj nga niveli qendror. Ka qenë rendi dhe rregulli, që së pari të merren propozimet nga dega, por një gjë e tillë nuk ndodhi, dhe mbetet të shohim në reflektimet e elektoratit tonë, kjo edhe për faktin se zgjedhjet nacionale na e dhanë një sinjal jo të këndshëm për subjektin tonë, duke na sugjeruar reformim dhe vendimmarrje më të drejtë në raport me qytetarin dhe jo imponime kandidaturash nga udhëheqës dege.

Kosova.Info: Z. Bulliqi, tashmë Lidhja Demokratike e Kosovës, ka nominuar shumicën e kandidatëve për kryetar të komunave, të cilët do të garojnë në zgjedhjet e 22 tetorit. Sa jeni të kënaqur me këto propozime, pasi që shumica e këtyre kandidatëve për kryetar të komunave vetëm janë rikandiduar?

Shpejtim Bulliqi: Mendoj se disa nga nominimet janë të qëlluara dhe kanë treguar një menaxhim të mirë nëpër komunat e tyre, janë njerëz me kredibilitet politik dhe menaxherë, por për fat të keq, ka edhe të tillë që kanë treguar se para se gjithash, kanë interesin individual e klanor dhe çështjen e menaxhimit komunal e trajtojnë si menaxhim biznesi, sesa si detyrim në përmbushjen e nevojave për qytetarët e tyre.

Kosova.Info: Çfarë dëshmie është sipas jush, rikandidimi i disa kandidatëve për kryetar të komunave, pasi që një gjë e tillë vendoset nga strukturat udhëheqëse qendrore të LDK-së, e në të cilat ju ka kohë që nuk po merrni pjesë, jo pse ju mungon vullneti juaj për të marrë pjesë në këto takime, por nuk jeni ftuar asnjëherë?

Shpejtim Bulliqi: Po shikoni, kjo nuk besoj që është e mirë për elektoratin dhe qytetarët, sepse është shenjë e mos përfilljes së bazës e para, dhe e dyta është presedan, kjo që kësisoj të nominohen individët, disa prej tyre në fakt e kanë nominuar vetveten në këto kandidatura, duke udhëhequr me partinë në nivel qendror. Ndërsa, për mospjesëmarrje në takime, e vërtetë është se nuk mungon vullneti, por disa prej këtyre strukturave qendrore, kanë arritur që nivelin lokal të menaxhimit të partisë, e kanë ngritur dhe po e imponojnë në nivelin qendror. Duke anashkaluar të gjithë ata që nuk kanë të njëjtin mendim me ta, dhe duke diktuar agjenda klanore dhe individuale të interesit.

Kosova.Info: Z. Bulliqi, këto propozime për herë të parë në historikun e LDK-së, janë bërë vetëm nga niveli qendror duke mospërfillur së paku propozimet e strukturave në nivel degësh. Si e komentoni këtë mospërfillje të strukturave në nivel degësh?

Shpejtim Bulliqi: E thash edhe më herët, keq sepse është mospërfillje e elektoratit dhe qytetarit.

Kosova.Info: Me këto veprime, a po ju mbyllet dera kuadrove të reja, e të cilat do të mund ta rikthenin besimin e elektoratit të LDK-së, pasi që në rezultatet e fundit të zgjedhjeve të përgjithshme është vërejtur se ka humbur besimi i qytetarëve të Kosovës, ndaj lidershipit të LDK-së?

Shpejtim Bulliqi: Sigurisht që po, LDK më tepër se kurrë ka pasur nevojë të hapet ndaj kuadrove të reja, sepse është klanizuar tej mase, nga njerëz që përveç interesit individual, nuk shohin asgjë tjetër. Pastaj, disa edhe e kanë kohën e pensionimit të qetë e pa brenga, sepse tutje nuk kanë çka i dhënë politikës dhe qeverisjes, edhe pse disa as në fillim nuk kanë pasur diçka të tillë.

Kosova.Info: Z. Bulliqi, ka një kohë të gjatë që lidershipi i LDK-së, ju ka anashkaluar në mënyrë të skajshme, duke ju “bllokuar”, në të gjitha aktivitetet partiake, gjë kjo e cila më së miri është dëshmuar me mospjesëmarrjen e rikandidimit tuaj si deputet i Kuvendit të Kosovës ne zgjedhjet e fundit në vend. Pse kjo “bllokadë’, ndaj jush?

Shpejtim Bulliqi: Po, si duket qëndrimet e mija parimore për disa prej proceseve në të cilat ka kaluar vendi dhe disa edhe tipike profesionale, për të cilat unë kam pasur qëndrim korrekt, disa prej tyre i kanë penguar dhe po i pengojnë. Opinioni dhe elektorati jonë e ka të qartë kush qëndron prapa këtyre bllokadave, dhe besoj që edhe gjatë këtyre zgjedhjeve, ata do t’u japin leksione, se si duhet të qeveriset në të mirë të qytetarëve, duke i sanksionuar për veprimet e bëra, të cilat drejtpërdrejtë e kanë dëmtuar partinë, e edhe kuadrot e reja me perspektiv që kanë mundur t’i dhënë shumë politikëberjes aktive.

Kosova.Info: A do të thotë se “bllokada”, e krijuar tashmë ndaj jush nga lidërshipi i LDK-së, vjen si pasoj se ju nuk keni qenë I dëgjueshëm ndaj kërkesave të lidershipit të këtij subjekti politik, sidomos në çështjen e demarkimit të kufirit mes Kosovës dhe Malit të Zi, ku ju z. Bulliqi, keni qenë zëri më kundërshtues iI këtij procesi?

Shpejtim Bulliqi: Kjo çështje tashmë është njohur nga të gjithë ata që sado pak i njohin rrethanat e krijuara tek ne. Partia me ato diferencime që ju kanë bërë këtyre individëve, ka humbur relativisht shumë, dhe kjo tregon edhe një shembull të keq, se si nuk duhet të qeverisë partia nga individ idhnak dhe me mentalitet provincial, që i kanë sjellë dëme vendit dhe partisë, më se tepërmi qytetarit të Kosovës.

Kosova.Info: Z. Bulliqi, cili është qëndrimi juaj, nëse i nominuari për kryeministër i koalicionit PAN, z. Ramush Haradinaj, me krijimin e Qeverisë së re, ju ofron pozitën e kreut të Komisionit Shtetëror për demarkimin e kufirit mes Kosovës dhe Malit të Zi, pasi që të dy keni qenë kundërshtarët më të fuqishëm, të kësaj çështjeje?

Shpejtim Bulliqi: Shikoni tanimë ne e dimë se ekziston një Komision i tillë në nivel vendi. Ai Komision e ka bërë punën e vetë, edhe pse ne nuk jemi pajtuar me formën si është punuar dhe rezultatin që ka dhënë. Nëse diçka e tillë kërkohet nga institucionet e vendit, ne kemi pasur gatishmërinë që punën tonë dhe profesionalizmin, ta vejmë në dobi të shtetit tonë në çdo fazë.

Kosova.Info: A jeni i gatshëm për një bashkëpunim të ri me z.Haradinaj, gjithmonë në interes të shtetit të Kosovës?

Shpejtim Bulliqi: Unë do bashkëpunoj me të gjithë ata, të cilët punojnë për të mirën e qytetarëve dhe të vendit, duke e dhënë në dispozicion profesionalizmin dhe punën time.

 Kosova.Info: A besoni që z. Haradinaj, do të jetë kryeministri, që në këtë periudhë kohore, më së shumti i duhet shtetit, sidomos në realizimin e premtimeve ndaj qytetarëve të vendit?

Shpejtim Bulliqi: PAN i ka fituar zgjedhjet nacionale dhe z. Haradinaj është i nominuari i tyre për Kryeministër të vendit. Të tjerët gjithmonë janë thirrur në respektim të institucioneve, dhe besoj që këtë do ta bëjnë dhe do krijohet mundësia, që në mënyrë demokratike, të zgjidhen institucionet të vendit, sepse vendi ka nevojë që sa më shpejtë të ndodhë kjo punë.