Shoqëria civile i propozon Komunës së Podujevës masa preventive kundër koronavirusit

Përfaqësues të rrjetit të organizatave joqeveritare lokale “Demokracia Fillon Këtu – DFK” u ka bërë thirrje zyrtarëve komunalë të Podujevës që t’i organizojnë edhe nënshtabet e krizës për ta menaxhuar më mirë gjendjen me koronavirus. Sipas DFK-së nuk duhet të presin që t’i sanojnë dëmet e këtij virusi, por duhet të ndërmarrin masa preventive.

“Duke parë gjendjen në të cilën ndodhemi nuk e kemi luksin për të shkuar pas krizës duke sanuar dëmet, por duhet të ndërmarrim masa preventive të menjëhershme për të organizuar çdo mekanizëm për të qenë në nivel të detyrës për të dhënë maksimumin për të minimizuar dëmet e mundshme. Fatkeqësisht, Komuna e Podujevës është goditur me rastet e para të prekjes nga COVID-19 dhe si pasojë kemi edhe viktimën e parë në nivel vendi po nga komuna jonë”, thuhet në një komunikatë të OJQ “Demokracia Fillon Këtu”. “Prandaj duhet në maksimum të përkushtohemi dhe mobilizohemi tërë qytetarët bashkë me institucionet lokale për të përballuar këtë situate”, raporton KOHA.

Zyrtarët e DFK-së i kanë propozuar Komunës së Podujevës gjashtë masa që duhet ndërmarrë. E para, sipas kësaj organizate, është themelimi i nënshtabeve të krizës në çdo lokalitet-fshat në nivel komune dhe të bëhen publike udhëzimet si të funksionojnë. Pastaj të caktohen përgjegjësit e fshatrave dhe të publikohen emrat e tyre në mënyrë që qytetarët të kenë një adresë për t’u drejtuar në lokalitetin e tyre; të identifikohen të gjitha rastet sociale dhe rastet e tjera që mund të kenë nevojë për mbështetje për çdo fshat a lokalitet për t’iu dalë në ndihmë në rast nevoje; të identifikohen burimet dhe pikat e furnizimit me ushqime në nivele të fshatrave në rast nevoje.

“Të kërkohet nga Komisioni komunal për veprime dhe masa parandaluese e mbrojtëse nga COVID-19 i Komunës së Podujevës, raportime nga nënshtabet për rastet e personave të kthyer nga diaspora dhe për rastet e mosrespektimit të udhëzimeve të Institutit të Shëndetit Publik; Të koordinohet shpërndarja e ndihmave të donatorëve dhe institucioneve komunale përmes këtyre nënshtabeve me qëllim të mos keqpërdoren apo të shkojnë aty ku ka nevojë”, thuhet në komunikatën e DFK-së. “Për të realizuar këtë ne si shoqëri civile jemi të gatshëm që me punë vullnetare të ndihmojmë për aq sa kemi mundësi e kapacitete, me qëllim që bashkë të bëjmë më të mirën për ta kaluar këtë situatë”.