Shoferi i ‘Postman’ tmerrohet në Pejë: Hajni i maskuar i hyn dajak dhe ia merr çantën me rreth 2 mijë euro

Rastet e grabitjeve e të vjedhjeve po vazhdojnë të rriten, ndërkohë që siguria për të lëvizur edhe në hapësirat publike po rrezikohet. Ndër rastet e shpeshta janë grabitjet e punëtorëve të postave të shpejta, të cilët përballen me hajnat teksa kryejnë punën e tyre. raporton Gazeta Sinjali. 

Kështu e ka pësuar edhe një shofer i postës “Postman”, i cili është grabitur në rrugën “Konstandini i Madh” në Pejë, të premtën në mbrëmje.

Burimet brenda Prokurorisë kanë bërë me dije se rasti ka ndodhur në lagjen Tophane, ku ndodhej shoferi i postës, të cilit paprimtas ia zuri rrugën një person i maskuar.

Sinjali mëson i dyshuari fillimisht e ka sulmuar fizikisht viktimën, e më pas ia ka grabitur një çantë në të cilën kishte paratë e pazarit ditor, rreth 2 mijë euro.

Përballë kësaj situate, viktima ia ka mësyrë menjëherë Policisë, ku e ka denoncuar rastin dhe ka dhënë deklaratën e tij për atë që ka ndodhur.

Me t’u përfunduar procedurat policore, Prokurori i Shtetit ka urdhëruar inicimin e rastit dhe nisjen e hetimeve për identifikimin dhe kapjen e të dyshuarit.

Rastin e kanë konfirmuar për Sinjalin edhe nga Policia Rajonale në Pejë.

“Viktima mashkull  kosovar, punëtor i një poste të shpejtë, ka raportuar se një person i dyshuar deri më tani i pa njohur me maske mjekësore, fillimisht e ka grushtuar disa here dhe pastaj ja ka grabitur çantën me rreth 1500-2000 (njëmijë e pesëqind deri në dymijë) €. I dyshuar nga vendi i ngjarjes është larguar në këmbë. Në lidhje me rastin është konsultuar prokurori i shtetit, rasti vazhdon të hetohet”, thuhet në përgjigjen e Policisë.