Shembja e dheut rrezikon edhe prishjen e një rruge të ndërtuar 5 vite më parë nga Ministria e Infrastrukturës në Podujevë

Rruga rajonale Podujevë-Reçicë, në fshatin Dvorishtë, rrezikon të shembet, pasi dheu poshtë rrugës ka rrëshqitur deri në cepin e asfaltit. Banorët thonë se është bërë shumë e rrezikshme të kalosh andej, sidomos për ngasësit e automjeteve, të cilët mund të mos e vërejnë rrëshqitjen e dheut poshtë asfaltit. Në Komunën e Podujevës kanë thënë se kjo rrugë është në përgjegjësinë e Ministrisë së Infrastrukturës. Ndërsa zyrtarët e kësaj të fundit thonë se nga e hëna do të fillojnë sanimin e kësaj rruge

Dvorishtë, Podujevë, 19 shkurt – E rrezikshme është bërë të kalosh në rrugën rajonale Podujevë-Reçicë, në fshatin Dvorishtë, aty ku kalon lumi i Mavriqit. Dheu ka rrëshqitur deri në cepin e asfaltit, duke rrezikuar kështu edhe shembjen e rrugës. Kjo rrugë, që është e frekuentuar edhe për shkak të Kullës së Demë Ahmetit në Reçicë, sipas banorëve, paraqet rrezik sidomos për ngasësit e automjeteve, të cilët mund të mos e vërejnë rrëshqitjen e dheut poshtë rrugës. Sahit Arifi, banor i këtij fshati, thotë se kjo rrugë që nga fillimi nuk është ndërtuar si duhet. Sipas tij, shembja e dheut poshtë rrugës ka filluar që para dy vjetëve.

“Qe dy vjet ka filluar të shembet gradualisht. Me kohë nuk është punua qysh duhet edhe lart po e sheh qysh çdo ditë shembet. Kjo është e rrezikshme, kah rrëzohet është edhe kja staza (anësoret e metalta v.j.). Është shumë e rrezikshme, po ndoshta ndërmerr dikush masa, e kqyr, e kontrollon këtë vend. S’e kanë punua me kohë qysh duhet, 2 centimetra nuk e kanë shtrua asfaltin, si petë laknori e kanë lanë”, ka thënë Sahit Arifi. “Është e rrezikshme është kjo rrugë. Mund të ndodhë diçka e të mbytet dikush. Paret janë shkua, s’ka përgjegjësi kurrkush. Veç valla marre për këta njerëz çka kanë ba në këtë vend. E kanë shkatërrua qe 20 vjet”.

Ndërkohë, zyrtarët komunalë të Podujevës e pranojnë se shembja e dheut paraqet rrezik për banorët e kësaj pjese dhe për shfrytëzuesit e tjerë të kësaj rruge. Por zëdhënësi Fatri Zhitia thotë se kjo rrugë rajonale është në përgjegjësi të Ministrisë së Infrastrukturës.

“Pasi kemi pranuar këto informacione nga banorët e asaj zone, Drejtoria e Shërbimeve Publike ka dalë në terren për të parë nga afër gjendjen e asaj rruge. Kjo rrugë është nën kompetencën e Ministrisë së Infrastrukturës e cila e ka ndërtuar 5 vjet më parë dhe është përgjegjësi e tyre për ta mirëmbajtur atë rrugë. Ne pasi kemi marrë këto informacione, drejtorit për Shërbime Publike i është drejtuar Drejtorisë së Rrugëve në Ministrinë e Infrastrukturës përmes një letre, ku ka kërkuar mirëmbajtjen e saj, e cila po i rrezikon banorët dhe kalimtarët”, është shprehur Fatri Zhitia.

Në anën tjetër, zyrtarët e Ministrisë së Infrastrukturës nëpërmjet një përgjigjeje me shkrim kanë thënë se zyrtarët përkatës e kanë vizituar aksin rrugor Podujevë –Reçicë (fshatin Dvorishtë) dhe kanë hartuar planin për sanimin e dëmit.

“Kompania e kontraktuar për mirëmbajtje të rrugëve në rajonin e Prishtinës nga e hëna do të fillojë mobilizimin në teren me pajisjet e nevojshme për sanimin e kësaj rruge rajonale”, thuhet në përgjigjen e Divizionit për Marrëdhënie me Publikun në Ministrinë e Infrastrukturës.​

Përveç shembjes së dheut në anën e poshtme të rrugës, aty vazhdimisht ka shembje edhe të gurëve që bien në rrugë nga pjesa e sipërme.

Kjo rrugë rajonale është ndërtuar para pesë vjetëve nga Ministria e Infrastrukturës dhe sipas banorëve që në fillim ka pasur defekte. Ata prapa kamerës janë ankuar se shiriti i majtë në një pjesë të rrugës në gjatësi prej 50 metrash është i ngushtë afro 1m, ku pamundësohet kalimi i dy veturave përnjëherë dhe kështu mund të shkaktohen aksidente në çdo kohë.