Shefi i ekzekutivit prezanton projektbuxhetin 2024, tregon ku do të shkojnë 3 miliardë e 314 milionë euro?

Kryeministri i Kosovës, Albin Kurti ka prezantuar para deputetëve të Kuvendi të Kosovës projektbuxhetin e vitit 2024. Shuma parashihet të jetë rreth tre miliardë e 314 milionë euro – ku pritet të shkojnë këto para?

Kurti e cilësoi këtë si buxhet të mbrojtjes dhe sigurisë, duke u shprehur fillimisht si vijon:

“3 miliardë e 314 milionë euro , do të jetë buxhet i mbrojtjes e sigurisë, për çka kemi ndarë 370 milionë euro, ose 22 për qind më shumë se sa aktualisht. 153 milionë euro për Ministrinë e Mbrojtjes, 216 milionë euro për MPB, më së shumti ndonjëherë.

Ushtrisë tonë që ia kemi rritur buxhetin e numrin e ushtarëve, do t’ia shtojmë edhe 600 ushtarë më shumë, kurse policia jonë, vitin tjetër do t’i ketë edhe 500 rekrutë të tjerë dhe 21 milionë për investime kapitale”.

Prioritet, sipas tij, kanë edhe ekonomia, shëndetësia, arsimi e sundimi i ligjit. Kurti pretendoi se për 32 muaj të mandatit të tij, janë shtuar 60 mijë vende pune.

“Përgjatë gati 32 muajve të mandatit tonë, ekonomisë iu shtuan 60 mijë vende pune, ku gjysma janë të rinj e të reja, vetëm me SuperPuna, për 8 muaj janë punësuar mbi 7 mijë e 700 të ri 18-25 vjeç, përafërsisht, 1000 të punësuar në muaj. Në buxhetin e vitit të ardhshëm kemi ndarë 29 milionë euro për masat e punësimit”, ka thënë ai.

Tutje, Kurti ka pëmrendur edhe paratë e ndara për ShSKUK-në e arsimin.

“Sa i përket sektorit publik, koeficienti i pagave do të jetë 110 euro, do të vazhdojmë të investojmë në renovimin e spitaleve, përmirësimin e shërbimeve e blerjen e pajisjeve, ashtu që më të dashurve tanë t’u mundësohet kujdesi i duhur. ShSKUK-së i është shtuar buxheti për 25 për qind, kemi ndarë mbi 340 milionë euro, përfshirë edhe grantin për komunave.

Për ndërtimin e çerdheve, zbatimin e reformave dhe mbështetjen e të rejave e të rinjve me bursa, së bashku me grantin që u ndahet komunave, sektorin e arsimit do ta mbështesim me 370 milionë euro, apo rreth 20 për qind më shumë se në vitin 2023″.

“Ministria e Drejtësisë do të ketë 31 për qind më shumë buxhet, të zbatohen reformat në drejtësi sepse edhe zotimi yn ëpër këtë mandate e për këtë legjislaturë ka qenë punë dhe drejtësi. 95 milionë euro për mbështetjen tonë për nënat lehona, dhe fëmijët nën 16 vjeç, nga e cila kanë përfituar mbi 40 mijë gra, nëna të reja”.

14 milionë euro, sipas Kurtit janë ndarë për banim social, 11 milionë për blerjen e objekteve të ambasadave nëpër botë dhe 65 milionë euro për bujqësi.

“Do të ketë invesitme të reja kapitale në infrastrukturë hekurudhore e rrugore, zona të reja ekonomike, diga, kapacitete energjetike, për këtë ka buxhet prej 860 milionë euro. Kemi ndarë 58 milionë euro për MKRS, për vitin që po vjen…Festën dhe gëzimin për kandidaturën e suksesshme për lojërat mesdhetare 2030 duhet ta përcjellim me përgatitje të hershme. Trendi i njëjtë do të vazhdojë edhe në vitet pasuese, deri në përmbushjen e investimeve deri në vitin 2030”.

Më tej, Kurti përmendi buxhetin për komunat:

“Buxheti i komunave ishte 527 milionë euro, sivjet 654 milionë euro, në 2024 do të jetë gati 200 milionë më shumë se san ë vitin e parë të qeverisjes tonë, ose 742 milionë euro, ka grant nga Qeveria dhe pjesa tjera e të hyrave vetanake”.

Po ashtu, këtë vit, sipas kryeministrit, buxhetit për shqiptarët në Luginën e Preshevës, Medvegjë dhe Bujanoc do të jetë tre milionë euro.

“Për më tepër, buxheti i vitit të ardhshëm do të jetë buxhet për shqiptarët në Luginë, do t’ia shtojmë edhe 1 milionë krahasuar me vitin e kaluar, nga 2 në 3 milionë euro. Kjo mbështetje është më e larta ndonjëherë dhe më shumë se të gjitha qeveritë marrë së bashku”.

Në fund, Kurti u bëri thirrje deputetëve që ta mbështesin këtë projektbuxhet.