ShBA “shuplakë” politikanëve: Vendosni interesat e qytetarëve para interesave tuaja

Përfaqësuesi amerikan tha se mbetet në dorën e Kosovës që të vendos për të ardhmen e saj.

Në pritjen shtetërore të organizuar nga Presidenca, në emër të shtetit amerikan foli Robert Karem, Ndihmës Sekretari i Mbrojtjes për Çështje të Sigurisë Ndërkombëtare.

Ai u tha politikanëve kosovarë që duhet të vendosin interesat e qytetarëve para interesave personale, duke shtuar se Amerika ka qenë me Kosovën në vitin 1999 dhe do të jetë edhe në të ardhmen.

“Ratifikoni Demarkacionin dhe vazhdoni dialogun për normalizimin e marrëdhënieve me Serbinë”, tha ai.

“Vendosni interesat e qytetarëve para interesave tuaja… Ne inkurajojmë Kosovën që të luftojë korrupsionin e krimin e organizuar”, tha Karem.

Ai shtoi se Amerika pret bashkëpunim edhe më të thellë me Kosovën dhe se do të jetë krah vendit në rrugën euro-atlantike.

Pritja shtetërore për dhjetëvjetorin e pavarësisë së Kosovës është organizuar nga Presidenca e Kosovës.