SHBA kërkon të dhënat e bashkëpunimit mes Serbisë dhe Rusisë

Bëhet e ditur se para vizitës së Aleksandar Vucic’it në Washington, kongresmeni demokrat kërkon të dhënat për bashkëpunimin e inteligjencës ruso-serbe, shkruan Gazeta Metro.

Para vizitës së kryetarit të Serbisë Aleksandar Vucic në Washington më 17 korrik, kongresmeni demokrat nga New York-u, Elliot Engel e ka paraqitur në Kongres raportin mbi bashkëpunimin për mbrojtje të Serbisë dhe Rusisë.

Në raport pretendohet se në afat prej 90 ditësh pas publikimit të tij, ministri i mbrojtjes duhet t’i prezantojë Këshillit për politikë të jashtme të Kongresit të dhënat mbi bashkëpunimin për mbrojtje dhe siguri në mes të Serbisë dhe Federatës Ruse, lajmërojnë mediet amerikane dhe transmeton gazetametro.net.

“Në raportin e vet, ministri i mbrojtjes duhet të përfshijë listën e sistemeve të armatimit dhe harduerëve ushtarakë, pastaj teknologjisë të vlerësuar më tepër se një milion dollarë të cilën Rusia ia ka siguruar Serbisë në vitin 2012”, thekson Engel, anëtari i rangut të lartë të Këshillit për politikë të jashtme të Kongresit.

Ai gjithashtu kërkon nga Pentagoni përshkrimin e pjesëmarrjes së forcave të armatosura të Serbisë në ushtrimet ushtarake ruse në vitin 2012.

Kërkohet lista e gjithë marrëveshjeve ruso-serbe për mbrojtje dhe siguri gjithashtu nga viti 2012, pastaj vlerësimi se si vendet të cilat kufizohen me Serbinë e vlerësojnë rrezikun nga forcat e armatosura të Serbisë për siguri kombëtare të tyre.

Në listën e kërkesave janë informatat mbi bashkëpunimin e inteligjencës ruso-serbe, pastaj në çfarë mase ndikon bashkëpunimi i Rusisë dhe Serbisë në bashkëpunimin e mbrojtjes dhe sigurisë së SHBA dhe Serbisë si dhe në bashkëpunimin e NATO’s me Serbinë.

Më herët është  publikuar se Vucic do të takohet në Uashington me zëvendëspresidentin e SHBA Mike Pence. /gazetametro.net.