Vdes mamia llapjane Sanije Topanica, iu ndihmoi grave në lindje gjatë luftës
Selmanaj ftoi Shpendin në LDK, Veliu i tregon se në parti vendos dikush tjetër
Deputeti Driton Selmanaj, gjatë një debati televiziv i kishte bërë ftesë publike kryetarit të Prishtinës, Shpend Ahmeti, që pas dorëheqjes nga Vetëvendosje, të anëtarësohej në LDK, duke thënë se këtë e kanë bërë para tij edhe shumë ish’anëtarë të tjerë të partisë së dikurshme FER.
Por, pas kësaj ka reaguar nënkryetari i LDK’së, Agim Veliu, duke i treguar Selmanajt, se nuk është ai që vendos se kush mund të hyjë e kush mund të dalë në LDK.
Veliu me këtë rast edhe pse nuk e ka përmendur askund Selmanajn në reagimin e tij, i ka dërguar mesazh, se vendimet në LDK nuk mund të merren nga njerëz që nuk i kanë bërë ende një vit në këtë parti me traditë gati 30 vjeçare, shkruan gazetametro.net.
Veliu e ka quajtur Shpendin shtegtar që lëviz nga njëra parti në tjetrën, dhe sipas tij, për të nuk ka vend në LDK.
“LDK është subjekt politik serioz dhe me traditë të gjatë, me struktura e me anëtarësi të organizuar. Në LDK gjithmonë janë anëtarësuar dhe bashkohen çdo ditë njerëz të lirë e me vullnet për të punuar në forcimin e Republikës së Kosovës”.
“LDK mbetet e hapur gjithmonë, por sigurisht që ata që i bashkohen këtij rrugëtimi duhet të kenë kryefjalë të punës dhe angazhimit politik frymën e shtetndërtimit, të cilën e kultivon LDK-ja ndër vite. Bashkimi me filozofinë tonë politike, asesi nuk funksionon mbi bazën e ftesave e nominimeve përmes televizioneve, e aq më pak kur bëhet fjalë për shtegtarë, që ikin nga foletë e tyre të djegura”, ka thënë Veliu.
Ndryshe, Selmanaj ftesën për kalimin e kryetarit të Prishtinës në LDK e kishte bërë në një debat televiziv në RTV21.
“Lidhja Demokratike e Kosovës është e hapur për të gjithë personat që dëshirojnë të bëhen pjesë e kësaj partie. Normalisht, që vija të kuqe kemi ndaj atyre njerëzve që kanë probleme me ligjin, e që Shpend Ahmeti nuk është njëri nga ata persona. Ka pasur raste kur kundërshtarë të tjerë të LDK-së, janë anëtarësuar në këtë parti, e kemi rastin e Alma Lamës. Prandaj, duhet mos të harrojmë se një numër i madh i ish-anëtarëve të FER-it kanë qenë të lidhur me LDK-në, por në fund kanë vendosur të bashkohen me VV. Është shumë logjike dhe racionale që ai të bashkohet në LDK”, kishte thënë Selmanaj. /gazetametro.net
