Seancë solemne dhe homazhe te shtatoret dhe varrezat e dëshmorëve në Ditën e Çlirimit të Podujevës

Për nder të Ditës së Çlirimit të Podujevës, u mbajt seancë solemne në shënim të kësaj dite, ku fjalë rasti mbajtën kryetari i komunës, Shpejtim Bulliqi, kryesuesi i Kuvendit, Hilmi Hoxha, përfaqësuesi nga shoqatat e dala nga lufta, Fahri Balaj dhe përfaqësuesi nga Komuna e Velbertit, Burghard Fulling.

Në fjalën e tij kryetari Bulliqi ka thënë se “19 qershori shënon datën e fundit, nga kalendari i ditëve të çlirimit nëpër komunat e Kosovës. Podujeva si një ndër komunat kufitare, ishte e fundit që u çlirua. Por jo vetëm për këtë arsye, Podujeva është komuna që ka histori të gjatë të revoltave kombëtare”.

“Podujeva frymoi kombëtarisht në çdo periudhë kohore. Llapi dhe Gollaku ishin në ballë të rezistencës me bacën Adem Demaçi dhe mësuesin Shaban Shala, ishin në ballë të rezistencës me Xheladin Rekaliun në demonstratat për flamur të vitit 1968. Ishin në ballë të demonstratave të vitit 1981 e 1989 me Aliun, Afrimin e Fahriun. Ishin në ballë të organizimit të jetës paralele me presidentin Rugova.

Ishin në ballë të luftës së UÇK-së, me Zahirin, Hakifin, Bahriun, Ilirin, Agronin, me qindra dëshmorë e mijëra ushtarë”.

Ndërsa kryesuesi i Kuvendit Hilmi Hoxha në fjalën e tij tha “Kjo datë na përkujton përpkjekjet dhe sakrificat e shumë brezave për liri dhe sot jemi mbledhur këtu për t’i përkujtuar dhe nderuar ata që luftuan dhe flijuan veten e tyre për lirinë dhe pavarësinë e vendit”.

Në fjalën e mbajtur përfaqësuesi i OVL-UÇK, Fahri Balaj tha “19 Qershori është data më e rëndësishme historike për Llapin. Në këtë ditë përfundimisht Podujeva u lirua nga okupatori dhe përpjekja e vetmohimi i shumë gjeneratave kulmoi me lirinë e atdheut”.

Në seancen solemne një fjalë rasti mbajti edhe kryetari i CDU-së në Velbert, Burghard Fulling i cili tha se është i lidhur emocionalisht me fatin e Podujevës dhe Kosovës dhe ndjehet jashtëzakonisht falënderues institucioneve të komunës për pritjen dhe mundësinë për t’ju uruar të gjithë llapjanëve ditën e çlirimit.

Pas seances u mbajtën homazhe dhe u vendosën lule të freskëta te shtatorja “Ali Ajeti”, shtatoret “Katër Dëshmorët” dhe varrezat e dëshmorëve në Penuhë.