Sa kanë shpenzuar ministrat e Qeverisë në dreka e darka gjatë vitit 2016 (Foto)

Instituti GAP ka publikuar një raport ku tregohen shpenzimet e zyrtarëve publikë për dreka, darka, pije dhe dhurata për takime të ndryshme zyrtare për vitin 2016, të cilat mbulohen nga buxheti i Kosovës e që kategorizohen si ‘shpenzime të reprezentacionit’, transmeton Gazeta Metro.

Sipas një udhëzimi administrativ të nxjerrë më 2008, Ministrat kanë të drejtë të shpenzojnë deri në 500 euro në muaj, zëvendësministrat deri në 200 euro në muaj e këshilltarët politikë deri në 50 euro. Kurse, Kryeministri dhe zëvendësit e tij nuk kanë kufizime në këtë kategori shpenzimesh.

Ministria e Integrimit Europian ka shpenzuar më së shumti, 29.531 euro. Pas saj radhitet Ministria e Punës dhe Mirëqenies Sociale me 22.745 euro dhe Ministria e Administratës Publike me 19.509 euro.

Ministri i cili ka shpenzuar më së shumti për reprezentacion gjatë vitit 2016 është ministri i Integrimit Evropian Bekim Çollaku me 14,372 euro. Ministri Çollaku më 9 shtator 2016 ka bërë publike dorëheqjen e tij nga posti i ministrit, por raporti i shpenzimeve tregon që ka përdorur buxhet edhe gjatë muajve shtator dhe tetor. Pas tij radhiten Ministri i Administratës Publike Mahir Yagcilar me 13,560 euro dhe Ministri i Punës dhe Mirëqenies Sociale, Arban Abrashi me 12,189 euro. Ministrat e lartë cekur si dhe ministrat Ljubomir Maric dhe Hykmete Bajrami kanë tejkaluar shumëfish kufizimin mujor prej 500 euro, thuhet në raportin e GAP.

Sa i përket shpenzimeve të zëvendësministrave, është zëvendësministri i Integrimit Evropian, Ramadan Ilazi, i cili ka shpenzuar më së shumti për reprezentacion, gjithsej 11,380 euro.  Pas tij radhitet zëvendësministri i Bujqësisë, Pylltarisë dhe Zhvillimit Rural, Radolub Miladenovic me 3,275 euro, dhe zëvendësministri i Punës dhe Mirëqenies Sociale, Qazim Rrahmani, me 3,224 euro. Zëvendësministrat e lartë cekur kanë tejkaluar kufizimin mujor prej 200 euro. /gazetametro/